Apple компанийн iPhone ухаалаг гар утсанд зориулсан iOS үйлдлийн системийн 16 дахь хувилбар өнөөдрөөс зах зээлд нэвтэрч байна.
iPhone 8 загвар болон түүнээс хойш үйлдвэрлэгдсэн бүх iPhone гар утсанд энэхүү системийг суулгах боломжтой юм. Ингэхийн тулд Settings->General->Software Update хэсэгт нэвтрээд зааврын дагуу үнэ төлбөргүй суулгана.
iOS 16 системд олон шинэ боломж нэмэгдсэний дотор хүмүүст хамгийн ойр боломжуудаас танилцуулж байна.
- Lock Screen (Цоожтой дэлгэц)
Цоожтой дэлгэц өмнөхөөсөө илүү хэрэглээтэй, ухаалаг болсон нь шинэ системийн нэг гол онцлог юм. Цоожтой дэлгэцэнд юу юуг гаргах, ямар хэлбэр бүтэцтэй харагдуулахыг шийдэхээс гадна олон дэлгэцийг ээлжлэн сольж болдог болжээ.
Өөрөөр хэлбэл дэлгэцийг баруунаас зүүн тийш гүйлгээд өөр өөр хэв маягтай, хэрэглээтэйг сонгож болно. Бас дэлгэцэнд харагдаж байгаа элементүүдийн фонт, өнгө, байрлал зэргийг хурууныхаа үзүүрээр өөрчилж болдог болжээ.
Өмнө нь зөвхөн Wallpaper буюу дэлгэцийн зургийг цоожтой дэлгэцэнд гаргадаг байсан бол одоо Цаг агаар (Weather), Од эрхсийн байрлал (Astronomy) зэрэг виджетүүдийг нэмээд бодит цагийн горимд (realtime) төрөл бүрийн мэдээлэл харах боломжтой болсон байна.
- Messages буюу мессэж
iPhone хооронд мессэж дамжуулдаг Messages үйлчилгээнд илгээснийхээ дараа засах, буцаах зэрэг өөр хэд хэдэн боломж нэмэгджээ. Тухайлбал хүнд илгээсэн мессэжээ 15 минутын дотор засах, хоёр минутын дотор буцааж татах (хүлээн авагч дээр устгах) боломжтой болсон байна. Илгээсэн мессэжээ зассан ч засахаас өмнөх анхны хувилбарыг хүлээн авагч харж болохоор шийджээ.
- Live Text буюу амьд текст
Дүрс бичлэгийг түр зогсоогоод дотор нь харагдаж буй текстийг хуулах, орчуулах зэргээр ашиглах боломжтой болжээ. Амьд текст нь англи зэрэг түгээмэл хэлнүүдээс гадна япон, солонгос, украин хэлээр бичсэнийг таньдаг болсон байна. Ер нь текстээс гадна гэрэл зураг, дүрс бичлэг доторх бусад хэлбэрийн мэдээллийг ч нэг товшилтоор сонгоод янз бүрийн зорилгоор ашигладаг болжээ.
- Health (Эрүүл мэнд)
Apple-ийн эрүүл мэндийн аппликэйшнд уух эмийнхээ хугацаа, давтамжийг тохируулан сануулдаг болгосон байна. Мөн ууж буй эмүүдийнхээ зургийг камераар оруулснаар ялгаж таних, интернэтээс мэдээллийг нь олж авах боломжтой болжээ.
- Эможи хайлт
iOS 16 системийн гарнаас эможийг бичиж хайхдаа монгол хэл ашиглах боломж нэмэгджээ. Apple компани шинэ системдээ олон үндэстний 19 хэлийг нэмсний дотор монгол хэл багтсан байна. Жишээлбэл амьтны эможи оруулахдаа “амьтан” гэж хайвал үр дүнд нь сонголтууд гарч ирэх юм.
Эх сурвалж: Apple
