Найман настай хүүхдийн утсыг дээрэмдсэн хэрэг гарчээ.
Тодруулбал, өчигдөр 15:30 цагийн орчимд Баянгол дүүргийн 26 дугаар хорооны нутаг дэвсгэрт байрлах ... байрны орцонд найман настай, хүүг “Үл таних хүн хуурч мэхлэн орц руу оруулж, айлган сүрдүүлж гар утсыг нь дээрэмдсэн” гэх дуудлага цагдаагийн байгууллагад бүртгэгдсэн байна.
Дуудлагаар тус дүүрэг дэх цагдаагийн газрын нэгдүгээр хэлтсийн Эрүүгийн цагдаагийн тасгийн алба хаагчид эрэн сурвалжлах ажиллагааг шуурхай зохион байгуулж тус дүүрэгт оршин суух 32 настай, эрэгтэй “Б” гэгч үйлдсэнийг тогтоожээ.
Улмаар мөрдөн шалгах ажиллагаа явуулж эхэлсэн байна.
Дээрэмдэх гэмт хэрэг үйлдсэн этгээд нь Эрүүгийн хуулийн дагуу хариуцлага хүлээдэг. Тус хуулийн 17.2 дугаар зүйлд:
1. Бусдын эд хөрөнгийг илээр, хүч хэрэглэхгүйгээр, хууль бусаар авсан бол зургаан сараас таван жил хүртэл хугацаагаар зорчих эрхийг хязгаарлах, эсхүл зургаан сараас таван жил хүртэл хугацаагаар хорих ял шийтгэнэ.
2. Бусдын эд хөрөнгийг хүч хэрэглэж, хүч хэрэглэхээр заналхийлж авахаар довтолсон бол хоёр жилээс найман жил хүртэл хугацаагаар хорих ял шийтгэнэ.
3. Энэ гэмт хэргийг:
- 3.1.байнга үйлдэж амьдралын эх үүсвэр болгосон;
- 3.2.зэвсэг, тусгайлан бэлтгэсэн зэвсгийн чанартай зүйл хэрэглэж үйлдсэн;
- 3.3.зохион байгуулалттай гэмт бүлэг үйлдсэн бол таван жилээс арван хоёр жил хүртэл хугацаагаар хорих ял шийтгэнэ хэмээн тус тус заажээ.