ОХУ-ын Элчин сайдын яамны албан ёсны хуудсанд Монгол-Оросын хамтарсан III сургуулийг үүсгэн байгуулах тухай 1994 оны хэлэлцээр, гэрээ болон тус сургуулийн дүрмийг байршуулжээ. Баримт бичгийг энд дарж үзнэ үү.
Дүрмийн 6.1-д сургуулийн захирал нь:
-Ардчилсан, ил тод, хүн төрөлхтний үнэт зүйлийг эрхэмлэсэн, хүний амь нас, эрүүл мэндийг хамгаалсан, хувь хүнийг чөлөөтэй хөгжүүлэх зарчмыг үндэслэн сургуулийг удирдана хэмээн заажээ.
Мөн дүрмийн
6.2-т Монгол Улсын БШУЯ нь Орос-Монголын хамтарсан дунд сургуулийн Ерөнхий удирдлыг хэрэгжүүлнэ.
6.3-т Монгол Улсын БШУЯ-наас томилогдсон захирал дунд сургуулийн шууд удирдлагыг хэрэгжүүлнэ.
7.1-т Сургуулийн захирал нь Монгол Улсын БШУЯ-ны өмнө ажлын үүрэг хариуцлага хүлээнэ хэмээн заажээ.
Өөрөөр хэлбэл БШУ-ы сайд Л.Энх-Амгалангийн хэлсэнчлэн Ж.Соронзон нь ОХУ биш Монголын хууль тогтоомжид захирагдаж, хэрэгжүүлэх үүрэгтэйг сургуулийнх нь дүрмэнд заагаад өгчээ.
БШУ-ы сайдын тушаалаар Монгол-Оросын хамтарсан III сургуулийн захирал Ж.Соронзонг үүрэгт ажлаас нь чөлөөлөөд буй. Энэ шийдвэртэй холбогдуулан ОХУ-ын ЭСЯ-наас “...Тус сургуулийн дүрэмд Монгол Улсын Боловсрол, шинжлэх ухааны яам нь захирлыг томилох эрхтэй гэсэн заалт тусгагдсан ч түүнийг огцруулах эрхийн талаар ганц ч үг байхгүй” хэмээн мэдэгдэж, энэ асуудлаар Монголтой адил тэгш эрх эдлэх ёстойгоо сануулаад буй юм.
Харин БШУ-ы сайд Л.Энх-Амгалан Оросын талын мэдэгдлийг Монголын тусгаар тогтнол, боловсролын сайдын бүрэн эрхэд халдсан увайгүй, бүдүүлэг үйлдэл хэмээн мэдэгдсэн юм. Салбарын сайдын мэдээллийн дараа ОХУ-ын ЭСЯ дээрх бичиг баримтыг пэйж хуудсанаа байршуулжээ.
Б.Хэрлэн
Shuud.mn
