Хятадын эдийн засгийн хямрал гүнзгийрч, гангийн салбар, нүүрсний зах зээлээ “татаж унагаах” байдалд оржээ. Түүхий эдийн хамгийн том зах зээлийн хямрал ганц Монгол Улс гэлтгүй дэлхийн эдийн засагт бүхэлд нь нөлөөлдөг билээ.
Номура судалгааны фирмийн тоймд дурдсанаар, энэ жилийн эцэст Хятадын эдийн засаг төлөвлөсөн ёсоор 5%-ийн өсөлтөд хүрэх нь байтугай 2.7%-д хүрэх үгүй нь эргэлзээтэй. Мөн ойрын 1-2 жилдээ тус улсын эдийн засгийн үзүүлэлтүүд тасралтгүй уруудах магадлалтайг анхааруулжээ. Хятадын эдийн засаг сүүлийн жилүүдэд ингэтэл “доройтсон” түүхгүй бөгөөд Ковид-19 цар тахлын нөлөө их байсан нь тодорхой юм. Дээр нь Хятадын Засгийн газраас хатуу хөл хориог үргэлжлүүлсээр байгаа нь байдлыг улам дордуулжээ. Одоогоор Хятадын 130 орчим сая иргэн, аж үйлдвэрийн томоохон хот, бүсүүд хатуу буюу хэсэгчилсэн хөл хорионд байна. Тус улсын эдийн засагт үүсэж буй гол эрсдлүүдээс дурдвал:
- ДНБ-ийнх нь 30%-ийг бүрдүүлдэг үл хөдлөх ба барилгын салбар бүрэн хямарч, өрийн сүлжээ үүссэн
- Барилга, үл хөдлөхийн эрэлт буурснаар гангийн хэрэглээ багасаж, коксжих нүүрсний зах зээлийг эрсдэлд оруулсан
- Ажилгүйдэл даамжирч, залуу ажиллах хүчний бараг 20 орчим хувь нь ажилгүйчүүдийн эгнээнд шилжиж байгаа
- Хатуу хөл хорио, цар тахлын нөлөөгөөр таваарын нийлүүлэлтийн сүлжээнд илт тасалдал үүссэн.
Гангийн үйлдвэрлэл, түүхий эдийн эрэлт багассанаас шалтгаалан коксжих нүүрсний зах зээлийн төлөв хүндхэн байна. Түрүүчээсээ Монголын ба гадаадын нүүрсний салбарын олон компаниуд алдагдал хүлээж байгаа. ANZ Research фирм энэ байдал цаашид ч үргэлжилнэ гэжээ.
Эх сурвалж: cnn.com, bloomberg.com
