Ирэх Даваа гарагт Лондон хотноо зохион байгуулагдах Их Британийн хатан хаан Хоёрдугаар Элизабет агсны төрийн оршуулгын ёслолд дэлхийн олон орны удирдагчид, хаад хатад оролцох төлөвтэй байгаа.
Тус улсын засгийн газар одоогоор оршуулгын ёслолд уригдах хүндэт зочдын нэрсийг гаргаж дуусаагүй байгааг өчигдөр албаны эх сурвалж мэдээлжээ.
Гэхдээ гурван улсын төрийн тэргүүнд урилга илгээхгүй байх шийдвэр нэгэнт гарсныг тэр баталсан байна. Эдгээр гурав нь ОХУ, Беларусь, Мьянмар ажээ.
Орос, Беларусь улсын ерөнхийлөгч нарыг уриагүй нь Украинд явуулж буй дайнтай нь холбоотой гэнэ. Харин нутгийн муслим хүн амын эсрэг харгислал явуулж буй гэсэн шалтгаанаар Мьянмарын удирдагчийг урихаас татгалзжээ.
Хааны ордны захиргаа засгийн газрынхаа зөвлөмж дээр үндэслэн урилгаа гадаад улс орнуудын удирдагчдад илгээх юм байна.
Ерөнхийдөө Их Британитай хэвийн дипломат харилцаатай улс бүр урилга авах гэнэ. Улс орнууд төрийн тэргүүн, засгийн газрын гишүүн, эсвэл Их Британи дахь элчин сайдынхаа аль нэгийг оршуулгын ёслолд оролцуулах төлөвтэй байна.
Хатан хааны оршуулгын ёслолд нийтдээ 500 орчим гадаадын хүндэт зочныг урихаар төлөвлөжээ.
Мөн Европын хаант засаглалтай орнуудын язгууртнууд, Японы эзэн хаан Нарүхито энэхүү түүхэн арга хэмжээнд оролцох нь тодорхой болсон байна.
Эх сурвалж: CNN