Оросын эзлэн түрэмгийллээс чөлөөлөгдөөд удаагүй байгаа Изюм хотод Украины ерөнхийлөгч Володимир Зеленский өчигдөр зочилсон нь гэнэтийн үйл явдал болжээ.
Өнгөрсөн долоо хоногийн сүүлээр Оросын олон мянган цэрэг энэ хотоос ухрахдаа их хэмжээний сум, зэвсэг техникээ орхисон юм. Энэ нь гуравдугаар сард Киевийн дэргэдээс ухарснаас хойших Оросын армийн хамгийн том ухралт болоод байгаа.
“Манай улсын газар нутгийг түр хугацаанд эзэлж болно. Гэхдээ манай ард түмнийг, украин хүмүүсийг эзлэх боломжгүй юм” гэж Изюм хотын захиргааны байранд болсон ёслолын арга хэмжээний үеэр Зеленский хэлжээ.
Тэрбээр цааш нь хэлэхдээ “Өмнө нь бид дээшээ харахад үргэлж хөх тэнгэр, алтан нар харагддаг байсан. Харин өнөөдөр бидэнд, ялангуяа түр эзлэгдээд байсан газар нутгийн хүн ардад манай төрийн далбаа харагдаж байна. Энэ нь манай баатрууд энд ирсэн гэсэн үг. Дайснууд зугтсан гэсэн үг юм” гэсэн байна.
Изюмын хохиролтой танилцаад Зеленский “Би үүнийг хараад цочирдохгүй байна. Учир нь Бучад бид ижил зүйлсийг харсан. Ижилхэн сүйрсэн байшин барилга, ижилхэн алагдсан хүмүүс” гэжээ.
Тэрбээр дайны гэмт хэрэгтнүүдийг олон улсын болон Украины шүүхийн өмнө авчирч чадна гэдэгт итгэлтэй байгаагаа энэ үеэр хэлсэн юм.
Дайны өмнө 50,000 оршин суугчтай байсан Изюм хот нь Украины хоёр дахь том хот Харьковыг дорнод бүсийн Словянск хоттой холбодог чухал зам дээр байрладаг.
Сүүлийн байдлаар Украины арми 8,000 орчим хавтгай дөрвөлжин километр газар нутгийг чөлөөлөөд байгааг Зеленский өмнө нь мэдэгдсэн юм.
Тэрбээр Украины эзлэгдсэн бүх газар нутгийг, 2014 онд ОХУ-д нэгтгэгдсэн Крымийг хүртэл буцааж авахаа мэдэгдээд байгаа.
“Бид буцааж авна. Хэзээ гэдгийг би мэдэхгүй, хэн ч мэдэхгүй. Гэхдээ бидэнд чөлөөлөх төлөвлөгөө бий. Учир нь энэ бол манай газар нутаг, манай ард түмэн” гэж тэр өчигдөр хэлжээ.
Эх сурвалж: Reuters
