Оросын нэгэн шоронд хоригдлуудын дунд зогсоод Украины дайнд явахыг уриалж байгаа хүний дүрс бичлэг өнөөдөр сошиал ертөнцөд тарсан байна.
Бичлэгт дүрслэгдсэн хүн нь Оросын хувийн батлан хамгаалахын компани Вагнер Группийн үүсгэн байгуулагч Евгений Пригожин болохыг эх сурвалжууд баталжээ.
Пригожин нь ОХУ-ын ерөнхийлөгч Владимир Путиний ойрын хүрээний хүн бөгөөд катерингийн бизнес эзэмшдэг тул “Путиний тогооч” хэмээх хочтой болсон байдаг.
Түүний байгуулсан Вагнер Группийн хөлсний цэргүүд хилийн чанадад Кремлийн сонирхлыг хамгаалах ажиллагаануудад оролцдог юм. Тухайлбал Сири, Ливи, Мали, Төв Африкийн БНУ-д тус компанийн цэргүүд үүрэг гүйцэтгэсэн баримт бий. Пригожинийг бас гадаад орнуудын улс төрийн амьдралд нөлөөлөх зорилготой “троллын арми”-ийг ажиллуулдаг гэсэн мэдээлэл байдаг.
PMC Wagner Group Evgeny Prigozhin is at a penal colony looking for new assault infantry to join his company. Refers to some of those who served 30 years in prison and died in battle as "heroes". pic.twitter.com/Gp3IOVHuAq
— Dmitri (@wartranslated) September 14, 2022
Хоригдлуудын дунд зогссон тэрбээр Украинд байлдсаныхаа төлөө эрх чөлөөгөөр шагнуулах боломжтойг ухуулан ярьж байна.
“Хэн ч буцаж ирээд дахин шоронд суухгүй. Зургаан сар үүрэг гүйцэтгээд эрх чөлөөтэй болно. Хэрвээ Украинд очсоныхоо дараа дундаас нь буцах гэвэл бид чамайг цаазална” гэж ярьсан Пригожин шийдвэр гаргах таван минутын хугацаа өгч байгааг бичлэгт харуулжээ.
Ингэхдээ тэр Орос улс Чечень, Афганистаны дайнаас илүү хэцүү хүнд дайнд оролцож байгааг сануулсан байна.
Хэрвээ дайнд явахыг зөвшөөрвөл архи, хар тамхи хэрэглэхгүй, дээрэм тонуул хийхгүй, нутгийн хүмүүстэй бэлгийн харилцаанд орохгүй байх ёстойг Пригожин анхааруулжээ.
Тэр бас дайнд явуулах хоригдлуудын насны хязгаарыг 22-50 гэсэн ч үүнээс залуу бол ар гэрийнхнийх нь зөвшөөрөлтэй элсүүлэх боломжтойг хэлсэн байна. Ингэхдээ элсэгчдийн эрүүл мэнд, биеийн хүч чадлыг нь шалгахаа бас хэлжээ.
Хэдий ахимаг настай ч бие бялдар сайтай бол тулалдах боломжтойг тайлбарлахдаа Пригожин өмнө нь элсүүлсэн 30 жилийн ялтай 52 настай хоригдол фронт дээр олон дайсныг алаад баатрын ёсоор амиа алдсан тухай жишээ болгон ярьжээ.
Эх сурвалж: Business Insider
