70 жил Их Британийн хаан ширээнд заларсан хатан хаан Элизабетыг оршуулах төрийн ёслол ирэх долоо хоногийн Даваа гарагт болох гэж байна.
Оршуулгаас өмнөх дөрвөн өдрийг хатан хаантай салах ёс хийх хүсэлтэй олон нийтэд зориулахаар болсон юм.
Пүрэв гараг бол энэхүү үйл ажиллагааны эхний өдөр байлаа. Өчигдөр өглөөний 7:00 цагт Темза мөрний өмнөд эргийн дагуу хатан хааны шарил байрлаж буй Уэстминстерийн ордон хүртэл 3 км гаруй урт үргэлжилсэн иргэдийн цуваа үүссэн байна.
Үүнээс гурван цагийн дараа цувааны урт 5 км хүрчээ. Цаашдаа иргэдийн цувааны урт 16 км хүрэх төлөвтэйг эрх баригчид тооцоолж, бэлтгэлээ хангасан байна.
Иргэдийн цуваа дагуу байрладаг бизнесийн байгууллагууд уртасгасан цагаар ажиллаж, эрх баригчид нийтдээ 500 зөөврийн жорлонг нээжээ.
Хатан хааны шарил Даваа гарагийн өглөөний 6:30 цаг хүртэл олон нийтэд нээлттэй байх юм. Олон мянган британичууд үүнийг амьдралд нэг удаа тохиох ховор үйл явдал гэж үзэж байна.
Лондон хотын захиргаа Даваа гараг хүртэл нийт 400,000 хүн хатан хаанд хүндэтгэл үзүүлэх тооцоо гаргажээ. Харин хэвлэлүүд энэ тоог хоёр дахин өсөх магадлалтай гэж үзэж байна.
Хатан хааны шарил байрлаж буй 11 дүгээр зуунд байгуулагдсан Уэстминстерийн ордон нь Британийн парламентын цогцолборын хамгийн хуучны барилга юм.
Уг ордон түүхийнхээ эхэн үед шүүхийн зориулалтаар ашиглагдаж байжээ. Тухайлбал 1649 онд Нэгдүгээр Чарльз хааныг шүүх хуралд энд болж байсан гэдэг.
Эх сурвалж: Reuters