ОХУ-ын гадаад хэргийн яам Украинд алсын тусгалтай пуужин нийлүүлэхгүй байхыг АНУ-ын засаг захиргаанд өчигдөр анхааруулсан байна.
Пүрэв гарагт сэтгүүлчидтэй уулзахдаа тус яамны хэвлэлийн төлөөлөгч Мария Захарова ийм зэвсэг Украинд нийлүүлэх нь АНУ-ыг мөргөлдөөний нэг оролцогч болгож байгаа бөгөөд хариуд нь ОХУ “газар нутгаа хамгаалах эрхтэй” гэж анхааруулжээ.
Ерөнхийлөгч Байдены засаг захиргаа 80 км хүртэл тусгалтай HIMARS пуужингийн системийг Украины армид нийлүүлсээр байгаа. Ингэхдээ Украины тал ийм зэвсгээр ОХУ-ын нутаг дэвсгэрт цохилт өгөхгүй гэсэн амлалт авсан гэж тайлбарладаг.
HIMARS нь бас 300 хүртэл километрийн тусгалтай ATACMS (Army Tactical Missiles System) тактикийн пуужинг харвах чадвартай юм.
“Хэрвээ Вашингтон алсын тусгалтай пуужингаа Киевт нийлүүлэх шийдвэр гаргавал “улаан шугам”-ыг давж, мөргөлдөөний нэг оролцогч болох юм” гэж Захарова өчигдөр мэдэгджээ.
Киевийн эрх баригчид одоогоор ATACMS пуужин хүлээж авсан эсэх талаар мэдээлэл өгөхөөс татгалзаж байгаа.
Наймдугаар сарын 9-нд Крымийн хойг дахь Оросын Саки агаарын бааз цохилтод өртөж, их хэмжээний хохирол амсаж байв.
Тухайн үед Украины эрх баригчид энэ цохилтын талаар тодорхой тайлбар хийгээгүй юм.
Саки агаарын бааз Украины хяналтад байгаа газар нутгаас доод тал нь 200 орчим километр зайтай оршдог. Зарим ажиглагчид үүнийг ATACMS мэтийн хэт алсын тусгалтай зэвсгээр үйлдсэн байж болзошгүй гэсэн таамаг дэвшүүлж байгаа.
Өнгөрсөн сард АНУ-ын засаг захиргаа $3 тэрбумын зэр зэвсгийн тусламж Украинд үзүүлэх болсноо зарласнаар нийт тусламжийн хэмжээ $10.6 тэрбумд хүрсэн юм.
Эх сурвалж: Aljazeera
