Баасан гарагт Шанхайн Хамтын Ажиллагааны Байгууллагын дээд чуулга уулзалтын үеэр Энэтхэг, Оросын төрийн тэргүүнүүд уулзжээ.
Хоёр улс Хүйтэн дайны үеэс сайн харилцаатай явж ирсэн ба ОХУ нь Энэтхэгийн зэр зэвсгийн хамгийн том нийлүүлэгч юм.
Харин Украинд дайн эхэлснээс хойш анх удаа нүүр тулан уулзахдаа Энэтхэгийн ерөнхий сайд Нарендра Моди “одоо дайн хийж суух цаг биш” болохыг ОХУ-ын ерөнхийлөгч Владимир Путинд хэлжээ.
“Эрхэм хүндэт ерөнхийлөгч өө, өнөөдөр бол дайн хийж суух цаг биш гэж би бодож байна” гэж Моди хэлснийг албаны эх сурвалжууд мэдээлсэн байна.
Энэтхэг улс дайны эхний өдрөөс хойш Оросын эзлэн түрэмгийллийг буруутгахаас зайлсхийж, хямд үнэтэй газрын тосыг нь их хэмжээгээр худалдан авч байгаа.
Модигийн хэлсэн үгийн хариуд Путин “Украины асуудалд таны баримталж буй байр суурь, санаа зовнилыг би ойлгож байна. Бид үүнийг төгсгөл болгохын төлөө чадах бүхнээ хийнэ” гэж хэлжээ.
Гэхдээ тэр Украины тал гэрээ хэлэлцээ эхлүүлэхээс татгалзаж, зөвхөн зэр зэвсгийн хүчээр асуудлыг шийдвэрлэх зорилготой байгааг Модид нэмж хэлсэн байна.
Украинд дайн эхлүүлсэн шалтгаанаар ОХУ олон улсын эдийн засгийн хоригоор шийтгүүлээд буй энэ үед Хятад, Энэтхэг улсууд эдийн засгийн гол тулгуур нь болж байгаа.
Гэвч хоёр том түнш нь Москвагийн Украинд явуулж буй үйл ажиллагаанд таагүй хандаж эхэлсэн нь сүүлийн хоёр өдрийн үйл явдлуудаас харагдаж байна.
Пүрэв гарагт Хятадын төрийн тэргүүн Ши Жиньпинтэй уулзсаныхаа дараа Путин түүнийг Украины хямралд санаа зовниж буйгаа илэрхийлсэн тухай мэдээлсэн юм.
Энэтхэгийн эрх баригчид Орос болон Өрнөдийн орнуудтай тэнцвэртэй харилцаатай байхыг хичээж байгаа. Гэвч сүүлийн үед ингэх нь улам хэцүү болж байна.
Энэтхэг нь ШХАБ-ын гишүүнээс гадна Хятадын хүч нөлөөг бүс нутагт хязгаарлах зорилготой АНУ, Япон, Австралитай хамтарсан Дөрвийн Эвсэлд багтдаг.
ОХУ-д Энэтхэгийн элчин сайдаар ажиллаж байсан Панкаж Саран ерөнхий сайдыгаа Путинд “нэлээд шулуун, илэн далангүй” үг хэлсэн гэж дүгнээд энэ нь Украины дайн дэлхий нийтийн анхаарлын төвд орж, хөгжиж буй орнуудад томоохон асуудал үүсгэж эхэлсний илэрхийлэл болохыг тайлбарлажээ.
“Энэ бол Орост өгсөн нэлээд хүчтэй дохио. Энэтхэг улс асуудлыг зөвхөн яриа хэлэлцээ, дипломат арга замаар шийдвэрлэх байр суурьтай байгааг тэр нөхөрсгөөр санууллаа” гэж Панкаж Саран хэвлэлд ярьжээ.
Энэтхэг улс бол дэлхийд зөвхөн Саудын Арабын дараа ордог томоохон зэвсэг импортлогч бөгөөд 2016-2020 оны импортынх нь 49.4 хувийг ОХУ нийлүүлсэн байна.
Эх сурвалж: AFP