Өнгөрсөн долоо хоногийн турш үргэлжилсэн Тажик-Киргизийн хилийн мөргөлдөөнд амиа алдсан хүний тоо бараг 100 хүрээд байна.
Зөвлөлтийн бүрэлдэхүүнд багтаж байсан энэ хоёр улс 970 км урт шугамаар хил залгадаг ба үүний тал орчим нь албан ёсоор тогтоогдоогүй, маргаантай байдаг. Хилийн маргаантай хэсэгт үе үе зэвсэгт мөргөлдөөн гардаг.
Тажикистаны тал Ням гарагт гаргасан мэдэгдэлдээ өөрийнх нь 35 энгийн иргэн алагдаж, 25 хүн шархадсан тухай мэдээлжээ. Сүүлд тус улсын гадаад хэргийн яам Киргизстаны талаас орон нутгийн сүмд дроноор довтлох үеэр 12 хүн алагдаж, 6 хүн шархадсан тухай мэдээлсэн юм. Харин Киргизстаны тал Баткены хилийн бүс нутагт 46 хүн алагдаж, 140 хүн шархадсан тухай мэдээлсэн байна.
Олон арван мянган иргэнийг Киргизийн тал хилийн бүс нутгаас нүүлгэн шилжүүлжээ.
2021 оны дөрөвдүгээр сард гарсан өмнөх хилийн мөргөлдөөний үеэр талуудаас нийтдээ 50 хүн алагдаж байв.
Өнөөдөр буюу Даваа гарагийг Киргизстан улсад үндэсний гашуудлын өдөр болгосон байна. Баасан гарагт талууд гал зогсоох тохиролцоонд хүрч, Тажикистаны ерөнхийлөгч Эмомали Рахмон, Киргизстаны ерөнхийлөгч Садыр Жапаров нар Узбекистанд болсон ШХАБ-ын чуулганы үеэр уулзсан юм.
Гэвч хэдхэн цагийн дараа талууд гал зогсоох тохиролцоогоо зөрчиж, харилцан буудалцаж эхэлсэн байна.
Ням гарагт ОХУ-ын ерөнхийлөгч Владимир Путин хоёр улсын удирдагчидтай утсаар ярихдаа зэвсэгт мөргөлдөөн дахиж гарахаас сэргийлэх, зөрчлөө дипломат арга замаар яаралтай шийдвэрлэхийг уриалжээ.
Бямба гарагт НҮБ-ын ерөнхий нарийн бичгийн дарга Антонио Гутерреш талуудын удирдагчдад “гал зогсоох яриа хэлэлцээ” эхлүүлэхийг бас уриалж байсан юм.
Эх сурвалж: AFP