Эдийн засгийн гүн хямралд унасан Ливан улсын иргэд банкан дахь хадгаламжаасаа мөнгө авахын тулд хүч хэрэглэх явдал сүүлийн үед нэмэгдэх болжээ.
Тус улсын эдийн засаг улам бүр доройтож, хүн амынх нь 75 хувь ядуусын эгнээнд шилжээд байна. 2019 оноос хойш Ливаны банкууд бэлэн мөнгө гадаад валютаар авахад хатуу хязгаарлалт тогтоосон юм. Ингэснээр олон сая хүн хадгаламжаасаа мөнгө авч чадахгүй болоод байгаа.
Өнгөрсөн Лхагва гарагт нэг эмэгтэй банкны салбарын ажилтнуудыг барьцаалж, мөнгө гаргаж өгөхийг шаардсан байна. Сали Хафез хэмээх энэ эмэгтэй эгчийнхээ хорт хавдрын эмчилгээнд зарцуулах мөнгө хадгаламжаасаа авах гэхэд банкны менежэр сард $200-аас илүү мөнгө гаргахгүй журамтайг тайлбарлажээ.
Хафез мөнгө гаргаж өгөхгүй бол өөрийгөө галдан шатаахаар сүрдүүлж байсан юм. Сүүлд Хафез тоглоомон буугаар банкийг барьцаалсан нь тогтоогдсон байна.
Sali Hafez held up a bank in Lebanon to take $13,000 from her frozen bank account to pay for her sister’s cancer treatment.
— Middle East Eye (@MiddleEastEye) September 16, 2022
Lebanese banks have frozen the bank accounts of most of their depositors since the country’s financial crisis in 2019. pic.twitter.com/DpUD5ZPtGn
“Эгч маань миний нүдний өмнө үхэж байна. Бидэнд хэн ч туслахгүй байна. Банк миний мөнгийг хулгайлсан. Надад алдах юм алга” гэж Хафез хэвлэлд ярьжээ.
Сүүлд банкны харилцагчдын эрх ашгийг хамгаалах хөдөлгөөнийхний тусламжтайгаар Хафез хадгаламж дахь $20,000-аасаа $13,000-ыг авч чадсан байна.
Аргаа барсан тэр бөөрөө зарах тухай хүртэл бодож байжээ.
Лхагва гарагт бас Ливаны өөр нэг банкны салбарт буугаар зэвсэглэсэн эрэгтэй мөнгөө нэхсэн тухай хэвлэлүүд мэдээлжээ.
“Эдгээр хүмүүс эрх баригчдаар ордон бариулах гэж олон арван жил ажиллаж, мөнгө хураагаагүй юм. Гэтэл өнөөдөр тэд эм ч худалдаж авч чадахгүй болоод байна. Засгийн газар ажлаа хийхгүй, эдийн засгийг сэргээх төлөвлөгөөгүй байна. Тиймээс хүмүүс санаачилгыг гартаа авахаас өөр аргагүйд хүрч байна” гэж “Depositor’s Outcry” банкны харилцагчдын эрх ашгийг хамгаалах хөдөлгөөний санаачлагч Ала Хорчид хэвлэлд ярьжээ.
Эх сурвалж: Business Insider
