Япон улсын хүн амын доторх 100-аас дээш настай иргэдийн тоо түүхэн дээд хэмжээндээ хүрчээ.

Баасан гарагт тус улсын засгийн газраас гаргасан шинэ тоо баримтаас үзвэл өнөөдөр Японд 100 болон түүнээс дээш настай 90,526 хүн амьдарч байна.

Энэ нь жилийн өмнөхөөс 5 хувиар өссөн, 20 жилийн өмнөхөөс тав дахин өссөн тоо юм.

Шинэчилсэн статистик мэдээллийг жил бүрийн есдүгээр сарын 19-нд тохиодог өндөр настнуудад хүндэтгэл үзүүлэх “Кэйро но Хи” өдрийг угтуулан танилцуулжээ.

Харьцуулбал АНУ нь Япон улсаас 200 гаруй саяар илүү хүн амтай хэдий ч 100 давсан настнуудын тоо нь 97,914 байдаг.

Япон улс дэлхийн хамгийн хурдтай хөгширч байгаа үндэстнүүдийн нэг юм. Мөн төрөлтийн тоо нь эрчимтэй буурч байгаа. Энэ байдал тус улсын тэтгэврийн системд хүнд дарамт болж байна.

Эрүүл мэндийн систем сайн хөгжсөн, зөв хооллолтын хэв маяг давамгайлдаг зэрэг нь Япон улс хүн амын урт наслалтаар дэлхийд Хонконгийн дараа хоёрдугаарт бичигдэхэд хүргэдэг.

Өмнө нь 100 нас хүрсэн иргэндээ Япон улсын ерөнхий сайд мөнгөн цом бэлэглэдэг байжээ.

Гэвч өндөр наслах хүмүүсийн тоо эрс нэмэгдсэн тул 2016 оноос эхлэн цомыг хямд металлаар хийлгэдэг болсон байна.

Япон улсын хамгийн өндөр настай иргэн болох 115 настай Фүса Тацүми хэмээх эмэгтэй одоо Осака мужид амьдардаг ажээ.

Эх сурвалж: Bloomberg