Оросын зэвсэгт хүчний харвасан пуужин өмнөд Украин дахь атомын цахилгаан станцын ойролцоо туссан тухай тус улсын ерөнхийлөгч Володимир Зеленский өчигдөр орой мэдээлжээ.

Тэрбээр “Бид үүнийг оройтохоос нь өмнө зогсоох ёстой” гэж сошиал хуудсандаа бичээд дэлхий дахинд ноцтой аюул учруулж буй Оросын талыг буруутгасан байна.

Өмнөд Украины Атомын Цахилгаан Станц нь нийслэл Киев хотоос өмнө зүгт 300 км зайтай оршдог. Энд нийт 2,850 мегаваттын хүчин чадалтай гурван реактор ажилладаг юм.

Украины төрийн өмчит Энергоатом компани станцын ойролцоох газарт пуужингийн цохилт хүрсэн тухай мэдээлжээ. Энэ үеэр өндөр хүчдэлийн гурван шугам болон ойролцоох усан цахилгаан станцын зарим байгууламж эвдэрсэн байна.

Дэлбэрэлтийн улмаас станцын 100 гаруй цонх хагарсныг бас мэдээлжээ. Пуужин туссан газарт 4 метрийн диаметр, 2 метрийн гүнтэй нүх үүссэнийг Энергоатом компани гэрэл зургаар харуулсан байна.

Сүүлийн үед Орос, Украины талуудын хооронд үргэлжилж буй байлдааны улмаас Запорожийн атомын цахилгаан станцад бас осол гарах эрсдэл нүүрлээд байгаа. Запорожийн станцаас ялгаатай нь өчигдөр цохилтод өртсөн станц нь Украины засгийн газрын хяналтад оршдог юм.

Зүүн хойд Харьков мужийг Украины арми бүрэн чөлөөлсний хариуд Оросын тал Украины хяналтад байгаа хотуудын дэд бүтцүүдэд агаарын цохилт өгсөөр байна.

Саяхан чөлөөлөгдсөн Харьков мужийн Изюм хотоос 450 орчим хүнийг бөөнд нь оршуулсан булш болон иргэдийг эрүүдэн шүүж байсан камерууд олдсон тухай Украины эрх баригчид мэдээлж байгаа.

Харин Кремлийн хэвлэлийн төлөөлөгч Дмитрий Песков үүнийг “гүтгэлэг” гэж нэрлэжээ.

Тэрбээр өчигдөр сэтгүүлчидтэй уулзахдаа Изюмээс олдсон гэх дайны гэмт хэргийн ул мөрийг Бучад зохион байгуулж байсантай ижил Оросын талыг буруутгах зорилготой Украины зохион байгуулсан ажил гэж тайлбарласан байна.

Өчигдөр бас Их Британийн батлан хамгаалах яам Украинд өрнөж буй дайны үйл явцын талаар тагнуулын албаныхаа шинэ тайлан мэдээг танилцуулжээ.

Уг мэдээнд өгүүлснээр сүүлийн 10 өдрийн дотор Оросын тал дөрвөн сөнөөгч онгоцоо алдсанаар дайн эхэлснээс хойш нийт алдсан онгоцны тоо нь 55 хүрсэн гэнэ.

Энэ нь Украины сөрөг довтолгоонд шахагдсан хуурай замын цэргээ дэмжихийн тулд Оросын агаарын хүчин өөртөө өндөр эрсдэлтэй ажиллагаа явуулж буйтай холбоотой байж болзошгүй гэж Британийн албаныхан тайлбарлажээ.

Эх сурвалж: Associated Press