Мягмар гарагт Оросын хөрөнгийн зах зээлийн гол индекс MOEX Russia 11 хувиар унасан нь Украинд дайн эхэлсэн хоёрдугаар сарын 24-нөөс хойших хугацааны хамгийн огцом уналт болжээ.
Сүүлд бага зэрэг сэргэсэн ч 8.8 хувийн уналттай өчигдрийн арилжаа хаагдсан байна.
Мягмар гарагт дэлхийн хөрөнгийн зах зээлийн хамгийн муу үзүүлэлттэй нь Оросын зах зээл байлаа.
Хөрөнгийн зах зээлийн уналт хоёр шалтгаантай гэж ажиглагчид дүгнэж байна.
Үүний нэг нь Украины эзлэгдсэн газар нутагт ОХУ-д нэгдэх асуудлаар бүх нийтийн санал хураалт явуулах тов гарсан явдал байлаа. Донецк, Луганск, Херсон, Запорожье мужуудын эзлэгдсэн нутагт есдүгээр сарын 23-27-ны өдрүүдэд санал хураалт зохион байгуулахаар болсноо Москвагаас томилогдсон орон нутгийн удирдлагууд өчигдөр зарласан юм.
“Уг санал хураалтуудын үр дүнг Украин болон Өрнөдийн орнууд хүлээн зөвшөөрөхгүй тул сөргөлдөөн үргэлжилж, ойрын үед дипломат шийдэлд хүрэхгүй нь тодорхой боллоо” гэж Нью-Йоркийн Brown Brothers Harriman & Co компанийн валютын стратегийн салбарын тэргүүн Вин Тин ярьжээ.
Өчигдөр бас Оросын парламент дайн мөргөлдөөний онцгой үед армийн эд хөрөнгөд хохирол учруулах, цэргийн албанаас оргон зайлах, захирагдахаас татгалзах зэрэг гэмт хэрэгт оноох шийтгэлийг чангатгах хуулийг баталсан юм.
Эндээс ОХУ-д цэргийн дайчилгаа явагдаж болзошгүй гэсэн айдас бий болсон нь бас хөрөнгийн зах зээлд муугаар нөлөөлсөн байна.
“Цэргийн дайчилгаанаас айх айдас индексүүдийг унагасан нь тодорхой. Санал хураалт, батлан хамгаалахын шинэчлэгдсэн хууль зэрэг нь уналтын гол шалтгаан болж байна” гэж Tinkoff Investment компанийн шинжээч Кирилл Комаров тайлбарлажээ.
Эдгээрээс гадна өчигдөр Туркийн ерөнхийлөгч Рэжэп Тайип Эрдоган НҮБ-ын индэр дээрээс үг хэлэхдээ ОХУ-ын ерөнхийлөгч Владимир Путинд эзэлсэн бүх газар нутгаа, түүний дотор Крымийн хойгийг Украинд буцааж өгөхийг уриалсан юм.
Эрдоганы хэлсэн үг дэлхийн тавцанд ОХУ улам бүр ганцаардаж буйг харуулж, Оросын хөрөнгийн зах зээлийн уналтад тодорхой хэмжээгээр нөлөөлсөн гэж үзэж байна.
Эх сурвалж: Bloomberg
