Бямба гарагийн шөнө Индонезын Маланг хотын стадионд болсон хөл бөмбөгийн тэмцээний үеэр эмх замбараагүй байдал үүссэний улмаас 125 хүн амиа алдаж, 180 орчин хүн бэртсэн тухай эрх баригчид Ням гарагт мэдээлжээ.
Зочин багтаа 3:2 харьцаатай хожигдсон орон нутгийн Arema FC клубийн уурссан хөгжөөн дэмжигчид талбайд дайран орох үеэр цагдаа нар тэднийг тараахын тулд нулимс асгаруулагч хий хэрэглэсэн байна.
Ингэснээр эмх замбараагүй байдал үүсэж, 125 хүн бусдад шахагдаж, дарагдсаны улмаас амьсгал нь боогдож амиа алджээ.
Энэ үеэр бас цагдаагийн хоёр албан хаагч амиа алдсан байна.
Маланг хотын Канжурухан стадионд болсон энэ явдал дэлхийн хөл бөмбөгийн түүхэнд гарсан хамгийн том ослуудын нэгд тооцогдож байгаа юм.
Индонез улсын Дорнод Жава мужийн дэд захирагч Эмил Дардак өчигдөр орой орон нутгийн телевизийн сувгаар хийсэн мэдэгдэлдээ 125 хүн амиа алдсаныг баталсан байна.
Өмнө нь албаныхан 174 хүн амь үрэгдсэн гэж мэдээлж байсан нь давхардуулан тоолсонтой холбоотойг тэр тайлбарлажээ.
Амиа алдсан хүмүүсийн нэгээс бусдынх нь нэр усыг тодруулж чадсан байна.
Бэртэж гэмтсэн иргэдийг орон нутгийн 10 эмнэлэгт тараан эмчилж байгааг Дардак мэдээлжээ.
Эмнести Интернэйшнл олон улсын хүний эрхийн байгууллага хязгаарлагдмал оройн зайд бөөгнөрсөн хүмүүс рүү нулимс асгаруулагч хий цацах тушаал хэн өгснийг зарлахыг Индонезын эрх баригчдад уриалсан байна.
Канжурухан стадион 42,000 хүний суудалтай ба үймээний үеэр 3,000 орчим хөгжөөн дэмжигч талбайд нэвтэрсэн ажээ.
Тухайн орой хоорондоо тоглосон Arema FC болон Персебаяа Сурабаяа клубүүд мөнхийн өрсөлдөгчид юм байна.
Тэмцээний үеэр мөргөлдөөн гарахаас сэргийлж, зочин багийн хөгжөөн дэмжигчдэд тасалбар зарахыг хориглож байжээ.
Дэлхийн хөл бөмбөгийн спортын дээд байгууллага FIFA-гийн ерөнхийлөгч Жанни Инфантино болсон явдалд эмгэнэл илэрхийлсэн байна.
Азийн Хөл Бөмбөгийн Холбоо, Европын клубүүд мөн эмгэнэл илэрхийлж, Испанийн клубүүд Ням гарагт болсон тэмцээнийхээ өмнө нэг хором дуугаа хурааж, хохирогчдын араас гашууджээ.
1964 онд Перу улсын нийслэл Лима хотын үндэсний цэнгэлдэх хүрээлэнд болсон Перу-Аргентиний тоглолтын үеэр 320 хүн амь үрэгдэж, 1,000 гаруй хүн бэртсэн нь хөл бөмбөгийн түүхэнд бичигдсэн хамгийн их хохиролтой тэмцээн болж байв.
Эх сурвалж: AFP
