Орос, Беларусь улсууд бүс нутгийн хамтарсан зэвсэгт хүчний салбар нэгжийг байгуулахаар тохиролцсон тухай Беларусийн ерөнхийлөгч Александр Лукашенко өчигдөр мэдэгджээ.
Өнгөрсөн долоо хоногт Санкт-Петербург хотод болсон тусгаар улсуудын хамтын нөхөрлөлийн орнуудын албан бус чуулганы үеэр ОХУ-ын ерөнхийлөгч Владимир Путинтэй энэ талаар тохиролцсон тухайгаа тэр ярьсан байна.
“Холбооны улсын баруун хил дээр хурцадмал байдал үүссэнтэй холбоотойгоор бид ОХУ болон Бүгд Найрамдах Беларусь улсын бүс нутгийн хамтарсан зэвсэгт хүчний салбарыг байгуулахаар тохиролцов. Эдгээр бүх алхмууд манай хууль дүрэмтэй нийцэж байгаа” гэж Лукашенко өөрийн батлан хамгаалах салбарын удирдлагуудтай уулзахдаа ярьсныг БелТА агентлаг мэдээлжээ.
Хамтарсан зэвсэгт хүчний салбарыг байгуулах зарлиг хоёр өдрийн өмнө гараад хэрэгжиж эхэлснийг тэр энэ үеэр албаныханд дуулгасан байна.
“Бидэнд хоёр дахь мөргөлдөөн хэрэггүй. Орос улс одоо өөрийн асуудалтай байгааг та бүхэн мэдэж байгаа. Тиймээс бид Оросын зэвсэгт хүчнээс их зүйл хүлээх хэрэггүй. Гэхдээ хамтарсан хүч маань сайн бэлтгэгдсэн нэг мянга гаруй бие бүрэлдэхүүнтэй байх болно” гэж Лукашенко энэ үеэр ярьжээ.
Эх сурвалж: ТАСС