Санкт-Петербург хотын оршин суугч, 60 настай эмэгтэй ОХУ-ын ерөнхийлөгч Владимир Путиний эцэг эхийн булшийг гутаан доромжилсон хэргээр баривчлагджээ.
Өнгөрсөн долоо хоногт хотынхоо оршуулгын газарт очсон ээж нь Даваа гарагт баривчлагдаад явсныг түүний хүү Максим Цыбанёв орон нутгийн хэвлэлд ярьсан байна.
Оршуулгын газарт очихдоо ээж Ирина Цыбанёва нь Путиний эцэг, эхийн булшин дээр зурвас үлдээсэн ажээ.
Өчигдөр Санкт-Петербургийн шүүх эхний хурлаараа Цыбанёвагийн саатуулах хугацааг 48 цагаар сунгах шийдвэр гаргасан байна. Хэрвээ шүүх түүнийг үзэн ядалтын улмаас бусдын булшийг гутаан доромжилсон хэрэгт буруутгавал тав хүртэл жил шоронд хорих ял эдлэх магадлалтайг өмгөөлөгч нь ярьжээ.
“Булшин дээр үлдээсэн зурваст юу бичигдсэнийг би мэдэхгүй байна. Ээж өөрөө хэлэхдээ ямар нэг хараал бичсэн гэж байгаа” гэж Максим Цыбанёв ярьсан байна.
Есдүгээр сарын сүүлээр Путиний эцэг эхийн булшин дээр сурагч дэвтрийн хуудсан дээр бичсэн зурвасыг хэн нэгэн үлдээж байжээ.
Уг зурваст “Хүндэт эцэг эх нар минь! Танай хүү аймшигтай муухай аашилж байна. Тэр түүхийн хичээлээ тасалж, ангийнхантайгаа зодолдож, сургуулиа дэлбэлэхээр сүрдүүлдэг болсон. Зохих арга хэмжээ авна уу!” гэж бичсэн байв.
Зурвасын агуулга Путиний эхлүүлсэн Украины дайныг илэрхийлсэн нь тодорхой байжээ.
Эх сурвалж: MediaZone