Сүүлийн 10 өдрийн дотор Оросын тал 300 гаруй удаагийн пуужин, дроны цохилтыг Украины эрчим хүчний дэд бүтэц, байгууламжуудад өгсөн байна.
Үүний улмаас Украин даяар эрчим хүчний хомсдол үүсэж, шуурхай хязгаарлалтын арга хэмжээ авахаар төлөвлөжээ.
Өдөр бүрийн өглөөний 7 цагаас хойш аль болох бага цахилгаан эрчим хүч хэрэглэж, болзошгүй тасалдалд бэлтгэлтэй байхыг Украины ерөнхийлөгч Володимир Зеленский өчигдөр иргэддээ анхааруулсан байна.
Зөвхөн Лхагва гарагт эрчим хүчний гурван байгууламж Оросын агаарын довтолгоонд сүйтгэгдсэн тухай тэр мэдээлжээ.
Өчигдөр Европын Холбооны дээд чуулганд видео холбоогоор үг хэлэхдээ Зеленский эзлэн түрэмгийлэгчид энэ өвөл Европ руу дүрвэгчдийн шинэ урсгал үүсгэх зорилгоор эрчим хүчний байгууламжуудад цохилт өгч байгааг тайлбарласан юм.
Үүний хариуд агаарын довтолгооноос хамгаалах систем олноор нийлүүлэхийг, бас Оросын талд дрон нийлүүлж буй Ираны эсрэг хориг арга хэмжээгээ нэмэгдүүлэхийг тэр холбоотнуудад уриалжээ.
Аравдугаар сарын дунд үе хүртэл Киев болон Украины бусад хэсэгт ер бусын дулаахан намар болж байв. Гэхдээ Пүрэв гарагаас цаг агаар хүйтэрч эхэлсэн байна.
Украины эрчим хүчний түгээлтийн Укрэнерго компани өдөр бүрийн 7-22 цагийн хооронд улс даяар дөрөв хүртэл цагийн эрчим хүчний тасалдал үүсэж болзошгүйг ард иргэдэд анхааруулжээ.
Хотуудад гудамж талбайн гэрэлтүүлгүүдийг унтрааж, иргэдэд шөнийн цагаар гар утас болон батарейгаар ажилладаг бүх хэрэгслээ цэнэглэхийг зөвлөж байна.
Эх сурвалж: The Guardian
