Кремлийн суртал нэвтрүүлэгчдийн нэг Антон Красовский саяхан Оросын төрийн өмчит Россия Сегодня теле сувгаар ярихдаа Украин хүүхдүүдийг усанд живүүлж, галд шатаахыг уриалж байжээ.
Улс орныг нь Оросууд эзлэн түрэмгийлсэн гэдэгт итгэдэг хүүхдүүдийг “түргэн урсгалтай голд живүүлэх”, “гэрт нь түгжиж байгаад амьдаар нь шатаах” ёстой гэж тэр ярьсан юм байна.
Красовксий өмнө нь бас ярихдаа Украин улс, үндэстэн гэж байх ёсгүй, Оросын бүрэлдэхүүнд бүрэн нэгдэх ёстой гэж байжээ.
Мөн нэг нэвтрүүлгийн үеэр тэр орос цэрэг өндөр настай украин эмэгтэйг хүчиндсэн тухай баримтыг ярихдаа инээдэм наргиан болгож байсан гэдэг.
Хэдийгээр Оросын суртал нэвтрүүлгийн хэрэгслүүд ялангуяа дайны энэ үед иймэрхүү үйлдлийг хааж хориглодоггүй ч Красовскийн ярьсан зүйл хэрээс хэтэрсэн байна.
Даваа гарагт Россия Сегодня суваг Красовскийг ажлаас нь түдгэлзүүлсэн бол Оросын Холбооны Мөрдөн Байцаах Товчоо түүнд бусдыг геноцид үйлдэхэд өдөөн турхирсан хэрэг үүсгэн шалгаж эхэлжээ.
“Одоогоор би Красовскийтай хамтын ажиллагаагаа зогсоож байна. Учир нь би болоод манай багийнхны хэн нь ч ийм зэрлэг балмад үйлдлийг дэмждэг гэсэн ойлголтыг бусдад төрүүлмээргүй байна” гэж РТ сувгийн ерөнхий эрхлэгч Маргарита Симоньян сошиал хуудсандаа бичсэн байна.
Украины гадаад хэргийн сайд Дмитро Кулеба энэ явдалтай холбоотойгоор РТ сувгийн дамжуулалтыг хориглох хэрэгтэйг дэлхийн улс орнуудад уриалсан юм.
“Улс орондоо РТ сувгийг гаргасны үр дүн энэ. Энэ бол үг хэлэх эрх чөлөөтэй ямар ч холбоогүй, хэрцгий геноцидод өдөөн турхирсан хэрэг. Бид энэ хүнийг шүүх болно. Дэлхий даяар РТ-ийг хориглох ёстой” гэж тэр мэдэгджээ.
Красовский нь ижил хүйстэн бөгөөд 2010-аад оны эхнээс Оросын төрийн ижил хүйстнүүдийг ялгаварлан гадуурхах бодлогыг эсэргүүцэн тэмцэгч байсан юм. Сүүлд 2020 онд Симоньян түүнийг РТ сувгийн орос хэлний албанд ажилд авч байжээ. Сөрөг хүчний төлөөллийг ажилд авсан нь тухайн үедээ Симоньяны зоригтой шийдвэрүүдийн нэг байсан гэдэг.
Өчигдөр бас Антон Красовский өөрийн ярьсан зүйлийнхээ төлөө олон нийтээс уучлал гуйсан юм.
“Хил хязгаарыг олж хараагүйдээ үнэхээр ичиж байна. Гэхдээ нэвтрүүлгийн үеэр догдолсон хүн өөрийн мэдэлгүй ингэх тохиолдол байдаг. Намайг уучлах байх гэж найдаж байна” гэж тэр мэдэгджээ.
Оросын суртал нэвтрүүлэгчдийн нэг Сергей Марков түүний хэлсэн үг үнэхээр жигшүүртэй байсан тул Красовскийг өрнөдийн тагнуулын албаны даалгавраар ийм зүйл ярьсан байж болзошгүй хэмээн сэжиглэж байгаагаа илэрхийлсэн байна.
Ер нь сүүлийн үед Оросын төв хэвлэлүүд суртал нэвтрүүлгийн алдаа гаргах давтамж нэмэгдэж байгаа.
Тухайлбал өнгөрсөн долоо хоногт ОХУ-ын батлан хамгаалах яамтай ойр ажилладаг нэг мэргэжилтэн тус улсын арми Ираны дроныг Украинд ашиглаж байгааг хүлээн зөвшөөрсөн ч энэ тухай асуухгүй байхыг хөтлөгчөөс хүссэн нь нийтэд ил болсон юм.
“Эрх баригчдаас бусад нь дронууд Ираных гэдгийг бид бүгд хүлээн зөвшөөрч байгаа. Гэхдээ ‘бид бүгд хөгийн амьтад гэдгээ мэддэг ч ийм үг хэрэглэдэггүй’ гэсэн хэлц үгийн утгыг мэдэх үү?” гэж Руслан Пухов энэ үеэр ам алдаж байжээ.
Эх сурвалж: The Guardian