Өчигдөр буюу Даваа гараг бол Хятадын төрийн тэргүүн Ши Жиньпиний гурав дахь бүрэн эрхийн хугацаа хэрэгжиж эхэлсэн эхний өдөр байлаа.

Гэтэл энэ өдөр Хонконгийн хөрөнгийн зах зээлийн хэмжээ сүүлийн 14 жилийнхээ хамгийн доод хэмжээнд хүрч, хөрөнгө оруулагчид эзэмшиж байсан хувьцаагаа их хэмжээгээр заржээ.

Үүний улмаас Хятадын хамгийн баян 13 хүний хөрөнгийн хэмжээ нэг өдрийн дотор $12.7 тэрбумаар хорогдсон байна.

Тухайлбал Tencent компанийн үүсгэн байгуулагч Пони Магийн хөрөнгийн хэмжээ $2.5 тэрбумаар багасаж, $25 тэрбумтай тэнцсэн нь хамгийн том хохирол болжээ.

Хонконгт бүртгэлтэй Tencent компанийн хувьцааны ханш өчигдөр 11 хувийн уналттай хаагдсан нь Магийн хөрөнгийн хэмжээнд ингэж нөлөөлсөн байна.

Бусад баячуудын алдагдлыг дурдвал Алибабагийн Жэк Ма $1.2 тэрбум алдаж $29 тэрбум, JD.com-ийн Ричард Лю $1.3 тэрбум алдаж $9 тэрбумтай тус тус үлдсэн байлаа.

Энэ өдөр Алибабагийн NASDAQ дахь хувьцаа 13 хувь, Хонконг дахь хувьцаа 11 хувь, JD.com-ийн хувьцаа аль аль бирж дээр 13 хувь унасан юм.

Ням гарагт Ши Жиньпин гурав дахь таван жилийн хугацаанд улс орноо удирдах багийг танилцуулсан. Тэдгээрийг дан өөрт үнэнч хүмүүсээр бүрдүүлсэн, шинэчлэл хийх чадвартай хүн сонгоогүй нь хөрөнгө оруулагчдыг айлгасан юм.

Мөн Хятадын эдийн засгийн өсөлтийн хурдыг сааруулж буй “Тэг Ковид” бодлого үргэлжлэн хэрэгжих магадлал өндөр болсон нь хөрөнгө оруулагчдыг болгоомжлоход хүргэжээ.

Эх сурвалж: Business Insider