Ням гарагийн өглөө каучук тариалдаг талбайд ажиллахаар явсан 50 гаруй насны эмэгтэй сураггүй алга болсон хэрэг Индонез улсын Жамби мужид гарсан юм.
Маргааш нь эмэгтэйг эрэн сурвалжлах явцад нутгийн иргэд маш том гэдэстэй аварга могой олжээ. Иргэд 5 метр урт биетэй могойг алж, гэдсийг нь ярахад дотроос нь сураггүй болсон эмэгтэйн цогцос бүтнээрээ гарсан байна.
Албаныхны мэдээлснээр хүн могойд залгиулах явдал ховор тохиолддог ажээ. Индонез даяар хамгийн сүүлд 2017, 2018 онуудад тус тус нэг ийм золгүй тохиолдол бүртгэгдэж байсан гэнэ.
Питон аварга могой барьсан амьтнаа бүхлээр нь залгидаг. Энэ амьтны эрүү нь маш уян хатан бүтэцтэй байдаг тул залгих амьтны хэмжээгээр сунадаг байна.
Ердийн үед жижиг мэрэгчдийг хүнсэндээ хэрэглэдэг питон аварга могой биеийн хэмжээ нь томрох тусам илүү том амьтныг ангийн олзоо болгодог тухай судлаачид тайлбарлажээ.
Энэ үедээ зэрлэг гахай, буга гөрөөс зэрэг том биетэй амьтдыг бүхлээр нь залгиж чаддаг байна.
Эх сурвалж: BBC
