Украины эрчим хүчний дэд бүтцэд халдсан эхний давалгаанаас хойш гурван долоо хоногийн дараа Орос улс шинэ цуврал цохилтууд өгч эхлэв. Киевт энд тэндгүй дэлбэрэлт сонсогдож, Харьковт метро зогссон бол өөр хэд хэдэн бүс нутгийн дэд бүтцийн чухал объектуудад ОХУ халдсан тухай мэдээлж байна.
Даваа гарагийн өглөө Киев, Харьков болон бусад хотын дэд бүтцийн чухал байгууламжуудад Оросууд их хэмжээний цохилт өгсөн тухай мэдээлэв. Хоёр хоногийн өмнө ОХУ Украиныг Крымын хойгийн эргээс Оросын Хар тэнгисийн флот руу дроноор дайрсан гэж буруутгасан юм.
ОХУ-ын Батлан хамгаалах яам Украинд хийж буй шинэ цохилтын талаар одоогоор тайлбар хийгээгүй байна.
Украины Агаарын довтолгооноос хамгаалах хүчний командлал Оросын 44 далавчит пуужинг сөнөөсөн гэж мэдэгдэв. Украины армийн мэдээлснээр Орос нийтдээ 50 гаруй пуужин харвасан байна.
Пуужингийн шинэ довтолгооны дараа Украинд нөхцөл байдал ямар байгаа талаар тодотговол:
Киев
Өглөөний 8:00 цагийн орчимд Киевийн оршин суугчдад дараалсан хүчтэй дэлбэрэлт сонсогдсоноос хойш удалгүй цахилгаан, холбоо тасарчээ.
Хотын дарга Виталий Кличко "Чухал дэд бүтцийн байгууламжид халдсаны улмаас нийслэлийн нэг хэсэг эрчим хүчгүй боллоо. Зарим бүс нутагт усан хангамж ч алга" гэжээ. Тэрээр Киевт 350 мянга орчим орон сууц цахилгаангүй болсныг хэлэв.
ОХУ эрчим хүчний байгууламжуудад цохилт өгч эхэлснээс хойш Украинд цахилгаан тасрах явдал гурван долоо хоног үргэлжилж байна. Москва энэ халдлагыг Крымийн гүүрэн дээр гарсан дэлбэрэлттэй холбон тайлбарлаж байгаа ч Киев хариуцлагыг хүлээхгүй байгаа.
Сануулахад аравдугаар сарын 11-нд Украины арми Оросын 84 пуужин (мөн 24 камикадзе дрон) харваж байв.
Харьков
Пуужингийн цохилтын дараа Харьков хотын метро ажиллахаа больсон. Хотын дарга Игорь Терехов "Харьковт хотын дэд бүтцийн чухал байгууламжид цохилт өгсөн" гэж мэдээлэв.
Харьков хотын метронд хорогдож буй хүмүүс
"Дэд бүтцийн чухал объектууд эвдэрсэн. Тиймээс цахилгаан тасарч болзошгүй. Одоогоор хүний амь нас эрсдээгүй байна" гэж бүс нутгийн цэргийн захиргааны дарга Олег Синегубов мэдэгдэв.
Харьков хотод метроноос гадна троллейбус, трамвай явахаа больжээ.
Бусад бүс нутгуудад
Запорожье, Черкасск болон бусад бүс нутгийн эрх баригчид мөн цахилгаан эрчим хүчний асуудалтай тулгарсан гэж мэдэгдэв. Черкасск мужид чухал дэд бүтцийн байгууламжуудын нэг нь сүйрч, үүний улмаас тус бүс нутгийн зарим хэсэг нь эрчим хүчгүй болсон гэж мэдэгдэв.
Запорожье мужид өглөөний 8:00 цагийн орчимд пуужингийн цохилт өгсөн, үүний уршгаар Киев мужид чухал ач холбогдолтой дэд бүтцийн байгууламжууд эвдэрч, цахилгаан тасрах эрсдэлтэй болсон.
Черновцы мужид мөн "Пуужингийн довтолгооны улмаас чухал дэд бүтцэд хохирол учирсан" гэж тус мужийн захиргааны тэргүүн Руслан Запаранюк мэдэгдэв.
Кировоград муж дахь Светловодскийн ойролцоох эрчим хүчний байгууламжуудын нэгийг пуужин оносон гэж бүс нутгийн цэргийн удирдлагын мэдээнд дурджээ. Урьдчилсан мэдээллээр хүний амь нас эрсдээгүй, "Галын хор уршгийг арилгах ажил үргэлжилж байна" гэж албаныхан мэдэгдэв.
Оросын арми гурван том усан цахилгаан станцад пуужингийн цохилт өгсөн. Тодруулбал, "Днеприйн усан цахилгаан станц, Днестрийн усан цахилгаан станц, Кременчугийн усан цахилгаан станц"-д цохилт өгсөн байна. Днеприйн УЦС Запорожье мужид, Кременчугскийн УЦС Кировоград мужид, харин Днестр бол Черновцы мужид байрладаг.
Днепропетровск мужийн Днепр, Павлоград хотын эрчим хүчний дэд бүтцийн байгууламжид цохилт өгсний улмаас ноцтой хохирол учирсан гэж тус мужийн цэргийн захиргааны дарга Валентин Резниченко бичжээ.
Винница мужид унасан пуужин иргэний объект руу унасан,, хохирол байгаа гэж мужийн захирагч Сергей Борзов мэдэгдэв.
Эх сурвалж: Toim.mn