Өмнөд Солонгосын өмнөх ерөнхийлөгч Мүүн Жэ Ин 2018 онд Умард Солонгосын удирдагч Ким Жон Унтай уулзахдаа бэлэгт авч байсан хоёр нохойгоо засгийн газарт буцааж өгөх болсноо өчигдөр мэдэгджээ.
Тус улсын одоогийн ерөнхийлөгчийн засаг захиргаа ноходтой холбоотой урсгал зардлыг төлөх сонирхолгүй байгаагаас ийм шийдвэр гаргахад хүрснээ түүний хэвлэлийн алба тайлбарласан байна.
Цагаан өнгөтэй Пунсан үүлдрийн хоёр нохойг Гоми, Сонган гэж нэрлэдэг. Энэ оны тавдугаар сард ерөнхийлөгчийн албан тушаалаас бууснаасаа хойш Мүүн Жэ Ин тэднийг хувийн орон сууцандаа тэжээж, арчилж байжээ.
Хуулиар бол эдгээр ноход ерөнхийлөгчийн архивт хадгалагдах ёстой төрийн өмчид тооцогддог. Гэвч одоогийн ерөнхийлөгчийн хүсэлтээр нохдыг Мүүн Жэ Ин хувийн байрандаа тэжээхээр шилжүүлэн авч байжээ.
Тиймээс арчилгаа маллагааг нь Өмнөд Солонгосын засгийн газар хариуцах ёстой юм байна.
Гэвч одоогийн ерөнхийлөгч Юн Сүк Ёлын засаг захиргаа нохдын зардлыг гаргахаас ямар нэг шалтгаангүйгээр татгалзсан тул Мүүн Жэ Ин цаашид үргэлжлүүлэн тэжээх боломжгүй болсныг тайлбарлажээ.
Нохдын нэг Гоми 2021 онд долоон гөлөг гаргасан аж. Тэднээс зургааг нь эзэнтэй болгосон Мүүн Жэ Ин нэг гөлгийг нь тэжээж байгаа юм байна.
Тиймээс гөлөгтэй нь хамт нийт гурван нохойг төрийн архивт буцаахаар болжээ.
Удаан хугацаанд тэжээж дассан нохдоосоо салах экс ерөнхийлөгчид хэцүү байгааг Мүүн Жэ Иний хэвлэлийн алба мэдэгдсэн байна.
Нохдыг тэжээх урсгал зардалд сар бүр 2.5 сая вон ( $1,800) зарцуулах эсэх асуудлаар засгийн газрын холбогдох албад хэлэлцэж байгаа тухай Даваа гарагт Өмнөд Солонгосын зарим хэвлэл мэдээлж байв.
Засгийн газрын нэг эх сурвалж нохдод зардал гаргахаас татгалзсан шийдвэр эцэслэн гараагүй, хэлэлцүүлэг үргэлжилж байгааг мэдээлсэн байна. Харин ерөнхийлөгч Юн Сүк Ёлын тамгын газар уг асуудалд шууд оролцоогүй, холбогдох албад тусдаа ярилцаж байгааг мэдээлжээ.
Эх сурвалж: Reuters