Төрөөд хэдхэн сартай байхаасаа эхлэн гэрийн хорионд байсан 8 настай охиныг саяхан чөлөөлснөө Германы хууль сахиулагчид мэдээлжээ.
Мария нэртэй энэ охин Кёльн хотоос зүүн зүгт оршдог 25,000 оршин суугчтай Аттендорн хэмээх жижиг хотод эмээ өвөөгийнхөө гэрт амьдарч байсан гэнэ. Ингэхдээ сүүлийн долоон жил хагасын хугацаанд өрөөнөөсөө гарах эрхгүй, цоожтой байжээ.
Чөлөөлөгдсөн охиныг шалгахад ямар нэг шим тэжээлийн дутагдалгүй, хөгжлийн бэрхшээлгүй, хэл ярианы доголдолгүй байсныг мөрдөгчид мэдээлсэн байна. Гэхдээ гадаад ертөнцийн талаар ойлголт маш бага, тухайлбал ой мод, гол нуур огт харж байгаагүй, автомашинд сууж үзээгүй байжээ.
Бас шатаар өгсөж чадахгүй, тэгш бус гадарга дээр бие даан алхаж чадахгүй байсан байна.
Байцаалтын явцад ээж, өвөө, эмээ нар нь охиныг яагаад нуух болсноо тайлбарлахаас татгалзсан тул шалтгааныг тогтоож чадахгүй байгаагаа хариуцсан мөрдөгч ярьжээ.
Салсан эцэг нь охиноо хамгийн сүүлд 6 сартайд нь харж байснаа мэдүүлсэн гэнэ. Сүүлд тэр охинтойгоо уулзах гэхэд экс хадмууд нь ээжтэйгээ хамт Италид амьдарч байгаа гэж хэлдэг байжээ.
Энэ оны долдугаар сард нутгийн хүмүүсээс мэдээлэл авсан эрх баригчид охин хаана байгааг шалгаж эхэлснээр олон жил гэрийн хорионд байсныг нь илрүүлсэн байна.
Зиген хотын прокурорын газар одоо охины ээж, эмээ, өвөө нарт хүүхэдтэй зүй бусаар харьцсан хэрэг үүсгэн шалгаж байгаа ажээ.
Хэрвээ буруутай нь тогтоогдвол охины ээж 10 хүртэл жил шоронд хоригдох юм.
Эх сурвалж: The Guardian