Энэ оны эхний есөн сарын байдлаар ОХУ-д ирсэн гадаадын жуулчдын тоо 2019 оны мөн үетэй харьцуулахад 29 дахин буурсныг Оросын Тур Операторуудын Холбоо өчигдөр мэдээлжээ.

“2022 оны эхний гурван улиралд ОХУ-д гадаадын 147,400 иргэн ирсэн байна. Харьцуулбал 2019 оны нэгээс есдүгээр сард 4.3 сая жуулчин, цар тахлын хамгийн хатуу хорио цээрийн дэглэмтэй 2021 оны эхний гурван улиралд 176,000 жуулчин ирж байсан юм” гэж тус байгууллагын мэдэгдэлд дурдсан байна.

2022 оны эхний есөн сарын хугацаанд ОХУ-д ирсэн жуулчдын тоогоор Герман (18,300), Турк (15,800), Иран (12,000), Куба (10,100), Казахстан (8,500), Узбекистан (6,600), Энэтхэг (5,300), АНУ (4,600), Армени (4,400), Израил (3,700) улсууд тэргүүлжээ.

Гэхдээ энэ хугацаанд ОХУ-д ирсэн гадаадын иргэдийн 65,900 нь жуулчилж ирсэн бол бусад нь өөр зорилгоор ирсэн байна.

Энэ он гарсаар гадаадын улс орнуудаас ОХУ-д аялал зохион байгуулсан тур оператор бараг байгаагүйг Оросын Тур Операторуудын Холбоо мэдээлжээ.

Эх сурвалж: ТАСС