Норвегийн гүнж Марта Луйз АНУ-ын иргэн, сүйт залуутайгаа ажиллаж, амьдрахын тулд язгууртны хэргэмээсээ татгалзаж байгааг өчигдөр зарлажээ.
51 настай гүнжийн сүйт залуу нь өөрийгөө зургаа дахь үеийн зайран гэж өргөмжилдөг Африк гаралтай АНУ-ын иргэн, 47 настай Дурек Веррет юм.
Веррет хорт хавдар, Covid-19 өвчнийг эмчлэх талаар өөрийн онолыг боловсруулснаа ном болгон хэвлүүлж, “Spirit Optimizer” нэртэй вэб сайт хүртэл ажиллуулдаг юм байна.
“Shaman Durek” нэрээр алдаршсан түүнийг дагагчдын дотор Гвинет Пэлтроу, Антонио Бандерас зэрэг Холливүүдийн алдартнууд байдаг ажээ.
Гүнжийн шинэ амьдрал Норвегийн нийгэмд маргаантай сэдэв болоод байгаа.
Есдүгээр сард явуулсан судалгаагаар Норвегийн иргэдийн 17 хувь нь гүнж, зайран хоёрын харилцаанаас шалтгаалан тус улсын хааны гэр бүлд хандах хандлагаа өөрчилсөн гэж хариулсан байна.
Марта одоогоос эхлэн Норвегийн хааны гэр бүлийг төлөөлөхгүй ч Верреттэй гэрлэх хүртлээ гүнжийн хэргэмийг зүүсэн хэвээр байх тухай тус улсын хааны ордны захиргаа өчигдөр мэдэгджээ.
Өмнөх гэрлэлтээсээ төрүүлсэн гурван хүүхэдтэй Марта цаашдаа сүйт залуугийнхаа анагаах ухааны бизнест хамтарч ажиллахаар санаа шулуудсанаа сошиал хуудсандаа бичсэн байна.
Эх сурвалж: AFP