Лхагва гарагийн орой ОХУ-ын батлан хамгаалахын сайд Сергей Шойгу ухрах тушаалыг Украины Херсон хотод байрлаж буй цэргийн анги нэгтгэлүүддээ өгсөн билээ.
Энэ талаар АНУ-ын ерөнхийлөгч Жо Байден саяхан сэтгүүлчдэд байр сууриа илэрхийлжээ.
“Орос улс, Оросын армид бодитой асуудал байгааг энэ үйл явдал батлан харуулж байна” гэж тэр энэ үеэр хэлсэн байна.
Оросын эрх баригчдын ухрах шийдвэр гаргасан цаг хугацааны талаар сэтгэгдлийг нь асуухад тэр “Тэд шийдвэр гаргахдаа АНУ-ын конгрессын сонгуулийн үр дүнг хүлээсэн нь миний сонирхлыг татаж байна” гэж хариулжээ.
Украины эрх баригчид Херсоны ухралтад нэлээд болгоомжтой хандаж байна.
Лхагва гарагийн орой хийсэн ээлжит мэдэгдэлдээ Украины ерөнхийлөгч Володимир Зеленский “Дайсан бидэнд бэлэг өгөхгүй, сайн санаа гаргахгүй нь тодорхой. Бид тулаанаа үргэлжлүүлнэ” гэж мэдэгджээ.
Тэрбээр цааш нь ярихдаа “Байлдаж байгаа бүх хүн алхам бүрдээ дайсны эсэргүүцэлтэй тулгарахыг ойлгох ёстой. Эсэргүүцэл бүрд бид баатруудынхаа амийг золиосолдог юм. Тиймээс бид маш болгоомжтой байж, сэтгэл хөдлөлд авталгүй, шаардлагагүй эрсдэлээс зайлсхийх ёстой. Бүх газар нутгаа чөлөөлөхдөө бид аль болох бага хохирол амсахыг хичээх ёстой” гэж хэлсэн байна.
Украины ерөнхийлөгчийн зөвлөх Михаило Подоляк “Херсон хотод Украины далбаа мандах хүртэл Оросын ухралтын талаар ярих утгагүй. Оросын цэрэг Херсон хотоос байлдалгүй гарах шинж тэмдэг бидэнд харагдахгүй байна” гэж Ройтерс агентлагийн сэтгүүлчид ярьжээ.
АНУ-ын зэвсэгт хүчний жанжин штабын дарга, генерал Марк Милли хэлэхдээ Оросууд Херсон хотоос гарах эхний шинж харагдаж байгаа ч бүрэн гарч дуусах хүртэл хугацаа орох төлөвтэйг анхааруулсан байна.
“Нэгээс хоёр өдрийн дотор хэрэгжиж чадахгүй байх. Мөрний зүүн эрэгт хүн хүчээ бүрэн гаргахад магадгүй олон хоног, хэдэн долоо хоног ч болж магадгүй” гэж тэр ярьжээ. Генералын тооцоолж байгаагаар одоо Днепр мөрний баруун эрэгт Оросын 20,000-30,000 орчим цэрэг байрлаж буй гэнэ.
НАТО-гийн ерөнхий нарийн бичгийн дарга Йенс Столтенбэрг “Энэ бол сүүлийн сар орчим хугацаанд Орос улс хүч чадлаа алдаж байгааг харуулсан ерөнхий дүр зургийн нэгээхэн хэсэг юм. Гэхдээ бид Оросын армийг дутуу үнэлж болохгүй. Тэдний дроны цохилт, пуужингийн цохилтыг бид харж байна. Тэд том хохирол учруулах чадалтай хэвээр байгаа” гэж ярьжээ.
Харин Украины дайны нэг гол тоглогч гэгддэг Оросын Вагнер Группийн эзэн Евгений Пригожин ухрах шийдвэрийг ойлгон хүлээж авч байгаагаа илэрхийлсэн байна.
“Суровикин амаргүй шийдвэр гаргасан. Гэхдээ тэр хариуцлагаас айлгүй ийм шийдвэр гаргалаа. Тэр хариуцлагыг өөртөө бүрэн хүлээж, нарийн бодож төлөвлөсний эцэст ингэсэн гэж бодож байна” гэж Пригожин ярьжээ.
Сүүлийн үед түүний холбоотноор тодроод байгаа Чеченийн Рамзан Кадыров бас “дэмий хохирол амсахаас зайлсхийж, хэцүү боловч зөв шийдвэр гаргасан” гэж Суровикиний шийдвэрийг өмгөөлсөн байна.
Херсоноос ухарснаар Оросын цэрэг Украиныг дундуур нь хуваан урсдаг Днепр мөрний баруун эрэгт ямар ч хяналтгүй болж байна.
Бас Херсон нь 2014 онд ОХУ-д нэгтгэгдсэн Крымийн хойгт хуурай замаар хүрэх цорын ганц замыг хянадаг хот юм.
Эх сурвалж: The Guardian
