АНУ-ын Ерөнхийлөгч асан Дональд Трамп АНУ-ын Ерөнхийлөгчийн 2024 оны Ерөнхийлөгчийн сонгуульд Бүгд найрамдах намаас нэр дэвшихээр өрсөлдөж буйгаа зарлалаа.
Тодруулбал "Америкийг дахин агуу болгох" хөдөлгөөний удирдагч Трамп Мягмар гарагт Флорида муж улсын Палм-Бич хот дахь Мар-а-Лаго эдлэнгээсээ үг хэлэхдээ гурав дахь удаагаа АНУ-ын Ерөнхийлөгчийн сонгуульд өрсөлдөхөө зарласан байна.
Трамп дэмжигчдэд хандан үг хэлэхдээ: "Америкийг дахин агуу, сүр жавхлантай болгохын тулд би АНУ-ын ерөнхийлөгчийн сонгуульд нэр дэвшиж байгаагаа зарлаж байна.Вашингтоны эрх мэдэлтнүүд амыг минь хамхихыг хүсч байгаа ч бид үүнийг зөвшөөрөхгүй. Өнгөрсөн зургаан жилийн хугацаан дахь хамгийн том ололт бол бидний бий болгосон хөдөлгөөн юм. Энэ хөдөлгөөн зөвхөн улс төрийн агуулгатай төдий биш. Энэ бол энэ агуу улс болох Америкийг хайрлах бидний хайраас үүдэлтэй ба бид энэ зорилгоо бүтэлгүйтүүлэхгүй" гэжээ.
АНУ-ын Ерөнхийлөгчийн сонгууль 2024 оны 11 дүгээр сарын 5-нд болно.
С.Сарнай
Sonin.mn
