Манай улсад ганц байдаг Түлэнхийн төвийн барилгыг 1950-аад онд ашиглалтад оруулснаас хойш зөвхөн урсгал засвараар 2011 оныг хүртэл үйл ажиллагаа явуулж ирсэн байдаг. Улмаар Мэргэжлийн хяналтын газраас тус төвийн байранд үйл ажиллагаа явуулах боломжгүй, шаардлага хангахгүй гэсэн дүгнэлт гарган акталж, Түлэнхийн төвийг ГССҮТ рүү нүүлгэснээр өнөөдрийг хүртэл тэнд иргэдэд үйлчилж байна. Сүүлийн жилүүдэд бага насны хүүхдийн түлэгдэлт нэмэгдэж байгаатай холбоотойгоор ГССҮТ-ийн нэг тасагт байрлаж буй Түлэнхийн төвийн ачаалал их байгаа юм. Тиймээс тус төвийг яаралтай ашиглалтад оруулах шаардлага тулгараад буй. Тиймээс Түлэнхийн төвийг энэ оны III улиралд ашиглалтад оруулах гэж байгаа тухай Эрүүл мэндийн сайд Д.Сарангэрэл өөрийн цахим хуудастаа бичжээ.

Тэрбээр “Түлэнхийн төвийн барилгыг яаравчлах шаардлагатайг ойлгуулах гэж эмэгтэй гишүүдтэйгээ газар дээр нь хэд хэдэн удаа очиж ажиллаж байсан юм. Түлэнхийн төвийг энэ оны III улиралд ашиглалтад оруулна” гэжээ. Эрүүл мэндийн сайд Д.Сарангэрэл өмнөх парламентын үед ГССҮТ-ийн Түлэнхийн тасгийн үйл ажиллагаатай танилцаж, Түлэнхийн төвийг яаралтай ашиглалтанд оруулах шаардлагатай гэдэгт шийдвэр гаргагчдын анхаарлыг хандуулж байсан юм. Үүний үр дүнд Төрийн ордон барихаар төлөвлөж байсан Кувейтын буцалтгүй тусламжийн санхүүжилтийг Түлэнхийн төвийг барихад зарцуулахаар шийдсэн юм. Түлэнхийн төвийг Кувейтын найман сая ам.долларын (20 тэрбум төгрөг) буцалтгүй тусламжаар барьж байгаа юм. Ийнхүү 2011 онд акталсан Түлэнхийн төвийн барилга ирэх намраас ашиглалтад орж үйлчлүүлэгчдээ хүлээн авах юм байна.

М.ЭНХ