Сүүлийн үед Их Британийн супермаркетууд бараагаа хулгайгаас хамгаалах нэмэлт арга хэмжээ авч эхэлжээ.
Учир нь инфляц, үнийн өсөлтийн улмаас тус улсад энэ оны дунд үе хүртэлх 12 сарын хугацаанд дэлгүүрээс бараа хулгайлах хэрэг 18 хувиар өссөн юм байна.
Их Британид инфляц сүүлийн 40 орчим жилийн хугацааны хамгийн дээд хэмжээндээ хүрээд байгаагаас иргэд өргөн хэрэглээний зарим бараа бүтээгдэхүүнийг худалдан авахад хэцүү болжээ.
Цаашдаа инфляц өсөхийн хэрээр ийм хэрэг нэмэгдэж болзошгүй байгаа тул дэлгүүрүүд зарим бараа бүтээгдэхүүндээ хулгайгаас хамгаалах зүүлт, төхөөрөмж хэрэглэж эхэлсэн байна.
Tesco Plc, J Sainsbury Plc зэрэг жижиглэнгийн худалдаа эрхлэгч байгууллагууд өнгөрсөн наймдугаар сард дэлгүүрийн хулгайтай тэмцэхэд илүү анхаарлаа хандуулахыг Британийн цагдаагийн газарт уриалж байжээ.
Аравдугаар сард Британид инфляцын хэмжээ түүхэн дээд хэмжээндээ буюу 14.7 хувьд хүрсэн юм. Ингэснээр иргэдийн хүнсэндээ зарцуулдаг жилийн мөнгөний хэмжээ 682 фунт стерлингээр нэмэгджээ.
Сүүлийн үеийн судалгаанд оролцсон Британийн айл өрхүүдийн дөрөвний нэг гаруй хувь нь амьжиргааны өртгөө дийлэхэд хэцүү болж байгааг илэрхийлсэн нь өнгөрсөн оны хэмжээнээс хоёр дахин өссөн үзүүлэлт болсон байна.
Тэдний хамгийн их санаа зовоож буй асуудал нь хүнсний бараа бүтээгдэхүүний үнийн өсөлт байжээ.
Энэ оны дөрөвдүгээр сард айл өрхүүдийн 16 хувь нь хоол хүнсний зардлаа танаж, засгийн газрын халамжийн системд хандах болсон байна.
Хүнснээс гадна бусад бараа бүтээгдэхүүний хулгай ч эрс нэмэгджээ. Үүнтэй холбоотойгоор Morleys Group саяхан Апминстерын их дэлгүүртээ 750,000 фунт стерлингийн хөрөнгө оруулж, үнэртэн гоо сайхны бараануудаа цоожтой хоргонд байрлуулах болсон байна.
Тус компанийн Брикстоны салбар их дэлгүүр 4 саяын өртөгтэй их засварын дараа нээгдэхдээ Dior, Jo Malone зэрэг брэндийн бараа бүтээгдэхүүнүүдийг цоожтой шилэн хоргонд байрлуулдаг болжээ.
Эх сурвалж: Bloomberg