"Miss Universe-2018" тэмцээний ялагчийг авлигаар тодруулсан байж болзошгүй талаар иргэн Б.Солонго өнөөдөр мэдээлэл хийлээ.

Тус тэмцээнд 50-60 сая төгрөгийн хахууль өгч ялагчаар тодордог байж болзошгүй хэргийн баримтыг тэрбээр АТГ-т өгч, шалгуулах хүсэлтэй байгаагаа илэрхийлэв. Түүнчлэн дээрх хэргийн мэдээллийг "Miss Universe-2018" тэмцээнийг зохион байгуулахад оролцсон нэр бүхий хүнээс авсан гэдгийг хэлсэн юм.

Энэ талаар иргэн Б.Солонго "Мисс гэдэг бол гоо зүйн бэлгэ тэмдэг. Тэр ч утгаараа нийгэмдээ маш их нөлөөллийг үзүүлж байдаг. Гэтэл Монголын миссүүд улсдаа ямар нөлөөллийн ажил хийсэн юм бэ, зүгээр л хүүхдүүдийн нүдийг хуурсан аахар шаахар буяны ажил хийчхээд мисс сэтэр зүүдэг.

Миний бие одоогоос дөрвөн жилийн өмнө “Miss Universe-2018” тэмцээнд оролцож байсан. Энэхүү тэмцээн нь Дональд Трампын шоу гэдгийг та бүхэн мэддэг байх. Дэлхийд нэр хүндээрээ эхний хоёрт, эрэмбээрээ гуравт бичигддэг том тэмцээн.

Тухайн үед тэмцээнийг шударга шүүлттэй, сайхан болж өндөрлөлөө гэж бодож байсан. Гэвч авлигын асуудал үүссэн байж болзошгүй байна. Дээр дурдсанчлан тэмцээнийг зохион байгуулахад оролцсон нэр бүхий хүн "Miss Universe-2018" тэмцээний ялагч нь 50-60 сая төгрөгийн авлига өгч түрүүлсэн талаарх мэдээлэл надад өгсөн. Тиймээс надад ирсэн баримт мэдээллийн дагуу Монгол Улсын иргэнийхээ үүргийн хүрээнд АТГ-т хандаж байгаа юм.

Авлигын эсрэг гэмт хэрэг зөвхөн улстөрч эсвэл төрийн албанд байдаг зүйл биш. Бараг бүх миссүүдийн бөгсөнд байдаг хэмжээний зүйл болсон юм болов уу гэдэг үүднээс хэвлэлийнхэнд хандаж байна. Монгол Улс авлигын эсрэг маш олон гэрээ, конвенцод нэгдсэн боловч индекс үзүүлэлтээрээ ухардаг юм байна. Гэхдээ миссийн тэмцээний ялагчийг арай ч хахуулийн замаар тодруулаагүй байгаасай гэж чин сэтгэлээсээ хүсэж байна. Мэргэжлийн байгууллага нь үүнийг шалгаж тогтоох байх. Миний бие бичлэгээр болон бусад хэлбэрээр хэд хэдэн баримтыг АТГ-т өнөөдөр өгч байна" гэлээ.

"ЭНДЭЭС ЯМАР ШАЛГУУРААР ЯВСАН НЬ ТОДОРХОЙГҮЙ МИССҮҮД ОЛОН УЛСЫН ТЭМЦЭЭНД ОЧООД АМЖИЛТ ҮЗҮҮЛДЭГГҮЙ"

Мөн үргэлжлүүлэн "2018 оны мисс шалгаруулалтын тэмцээнээс гадна дараа жилийнхээ ялагчийг хүртэл хахуулиар шалгаруулсан байж болзошгүй. Хэрвээ ийм үйлдэл гаргасан бол үнэхээр харамсалтай байна.

Би 2018 онд "Miss International Queen" гэх олон улсын тэмцээнд, дэлхийн хэмжээний шүүгчдийн өмнө шүүлгүүлж дэлхийн топ 10 трансжендер миссийн нэгээр шалгарч байсан. Монголын нөхцөлд ямар шалгууртай явагддагийг мэдэхгүй.

Манай улсад мисс шалгаруулалтыг хахуулийн замаар шүүдэг юм байна. Хэрвээ ийм зарчмаар шүүвэл дэлхийн өмнө Монгол Улсыг төлөөлж чадахгүй. Эх нь булингартай бол адаг нь булингартай гэдэг шиг манай миссүүд дэлхийд ямар ч амжилт гаргадаггүй. Тодорхой хэмжээний гавьяа шагналтай байх. Үүнийг ч мөн үгүйсгэхгүй. Гэхдээ эндээс ямар шалгуураар явсан нь тодорхойгүй миссүүд олон улсын тэмцээнд очоод амжилтын үзүүлэлт маш муу л байдаг.

Та бүхэн санаж байгаа бол "Miss Universe" тэмцээний үеийн бичлэг дээр топ 10 оролцогчоос нь англи хэлээр асуулт асуухад хэлний чадваргүй байсан талаарх асуудал ч үүссэн. Тэмцээний ялагчийг хахуулиар тодруулсан байж болзошгүй талаар зөвхөн иргэн Б.Солонго ярьж байгаа юм биш" хэмээн хэллээ