АНУ-ын сансар судлалын үндэсний байгууллага NASA ирээдүйд сарны гадарга дээр хүн буулгах зориулалттай Орион хөлгөө арваннэгдүгээр сарын 16-нд хөөргөсөн юм.
Нисгэгчгүй, автомат жолоодлоготой хөлөг нийт 26 хоног сансарт аялахдаа хүн аюулгүй тээвэрлэх боломжоо шалгаж, турших зорилготой.
Тэгвэл Даваа гарагт Орион хөлөг дэлхийгээс 430,000 км зайд хүрсэн нь хүн тээвэрлэх зориулалттай хөлгүүдийн хамгийн алс хол аялсан дээд амжилт болжээ.
Энэ нь Орион хөлөг туулах нийт замынхаа тэг дунд нь хүрсэн гэсэн үг юм байна.
Өнгөрсөн долоо хоногт NASA-гийн хөлөг сарны “Distant Retrograde Orbit” гэгддэг тойрог замд хүрсэн юм. Сарны гадаргаас 61,000 км зайтай тул “алсын” (distant), сарны эргэлтийн эсрэг чиглэлд хөлгийг хөдөлгөдөг тул “гэдрэг” (retrograde) гэж нэрлэсэн юм байна.
Ойрын өдрүүдэд Орион хоёр маневр хийснийхээ дараа дэлхий рүү буцах замдаа орох ажээ.
Улмаар арван хоёрдугаар сарын 11-ний өдөр Сан-Диего хотын эргээс холгүй Номхон далайн усанд буух төлөвлөгөөтэй байна.
Өмнө нь саран дээр хүн буулгаж байсан Apollo-13 аяллын хөлөг дэлхийгээс 400,171 км хол зайд хүрч байжээ.
Хоёр дахь удаагаа саран дээр хүн буулгах зорилготой Artemis төслийн хүрээнд 2024 оны сүүлээр Орион хөлөг анх удаа нисгэгчтэй сансарт хөөрөх бөгөөд сарны тойрог замд хүрэх юм. Харин саран дээр хүн буулгах хугацааг 2025-2026 он гэж тооцоолж байна.
Эх сурвалж: BBC