Олон нийтийн газарт Исламын шашны дэг ёсыг сахиулах үүрэгтэй ёс зүйн цагдаагийн албаа татан буулгаж буйг Бямба гарагт Иран улсын ерөнхий прокурор Мохаммад Жафар Монтазери орон нутгийн хэвлэлд ярьжээ. Гэхдээ энэ шийдвэр түр хугацааны, эсвэл байнгын эсэх талаар тодорхой мэдээлэл өгөөгүй байна.

Иран улсад гурав дахь сардаа үргэлжилж буй засгийн газрын эсрэг иргэдийн тэмцэл уг байгууллагатай холбоотой анх эхэлж байсан юм.

Есдүгээр сарын дундуур 22 настай Махса Амини хэмээх эмэгтэй олон нийтийн газарт толгойн өмсгөлгүй явсан үндэслэлээр ёс зүйн цагдаагийн хэсэгт саатуулагдаад байхдаа учир битүүлэг шалтгаанаар амиа алдаж байв.

Энэ явдлын дараа Иран даяар Тегераны дэглэмийг эсэргүүцсэн иргэдийн хөдөлгөөн өрнөсөн юм.

“Гашт-э Эршад” гэгддэг Исламын дэг ёсыг сахиулагч цагдаагийн албыг 15 жилийн өмнө ерөнхийлөгч Махмуд Ахмадинежадын үед байгуулж байжээ.

Уг албаны ажилтнууд Ираны хотуудын гудамж талбайгаар хар ногоон судалтай, цагаан өнгийн автомашинтай эргүүл хийж, иргэдийн дунд дэг журам сахиулдаг байв.

Тэд үсээ алчуураар нуугаагүй, задгай хувцасласан эмэгтэйчүүдэд амаар анхааруулга өгөх, зарим тохиолдолд саатуулж, шашны боловсрол мэдлэг олгох сургалтад хамруулдаг байжээ.

Исламын Суннит урсгалыг дагадаг Арабын зарим улсад охид бүсгүйчүүд олон нийтийн газарт явахдаа нүүр болон биеийн бүх хэсгээ нууж, далдлах үүрэгтэй байдаг.

Харин шийт урсгалын төв болох Иранд зөвхөн толгойн үсээ далдалж, алчуур зүүх шаардлагыг эмэгтэйчүүдэд тавьдаг юм.

Эх сурвалж: Aljazeera