Киргизийн нийслэл Бишкек хот дөрвөн дүүрэгтэй. Дүүрэг бүр нь хуучин Зөвлөлтийн үеийн нэртэй байдаг.
Зөвлөлтийн бүрэлдэхүүнд байсан Төв Азийн бусад бүх улсууд хуучин нэрээ сольсон бол Бишкек хот л хэвээр үлджээ.
Тухайлбал Бишкекийн дөрвөн дүүргийг Ленин, Свердлов (Зөвлөлтийн улс төрч), Биринчи Май (Майн нэгэн), Октябрь гэж нэрлэдэг.
Саяхан Киргизийн парламентын спикер Нурланбек Шакиев дүүргүүдийн нэрийг киргиз нэрээр солих санаачилга гаргажээ.
Тэр бас Киргизийн ард иргэд өдөр тутмын амьдралдаа орос биш киргиз хэлийг хэрэглэж, хэвших ёстой гэж үзэж байгаагаа энэ үеэр илэрхийлж байсан юм.
Шакиевын энэ санаачилга Оросын зарим улс төрчдийг бухимдуулжээ.
Тухайлбал ОХУ-ын төрийн Думын олон улсын харилцааны байнгын хорооны дэд дарга Дмитрий Новиков үүнийг “бага дээр нь дарах ёстой маш ноцтой сөрөг үйл явц” гэж тодорхойлсон байна.
Оросын бас нэг хууль тогтоогч Светлана Журова хуучин Зөвлөлтийн үеийн нэрсийг солих нь “эцэстээ орос хэлийг шахах зорилготой эхний жижиг алхам” гэж үзэж байгаагаа хэвлэлд ярьжээ.
“Дараа дараагийн шатанд сургуулиудаас орос хэлний хичээлийг хасаж, залуу үеийнхнийг орос хэлээр ярьдаггүй болгох зорилготой” гэж тэр ярихдаа Гүрж, Украиныг жишээ болгосон байна.
Оросын улс төрчдийн мэдэгдлийн дараа Киргизийн хууль тогтоогч Камила Талиева дүүргүүдийн нэрийг солих нь тус улсын дотоод асуудал тул оролцохгүй байхыг тэдэнд анхааруулжээ.
Тэрбээр дүүргүүдийн нэрийг солих санаачилга нь Оросын эсрэг үзлийг дэвэргэх зорилгогүй болохыг тайлбарлаж, энэ тал дээр санаа зовохгүй байхыг зөвлөсөн байна.
Гэвч асуудал ингээд намжсангүй Журова дотоодын хэвлэлд өгсөн ярилцлагадаа энэ асуудалд ОХУ-ын ерөнхийлөгч Владимир Путин оролцох ёстой гэж хэлжээ.
Путин өмнө нь ч Киргизстан дахь орос хэлний асуудалд анхаарлаа хандуулж байсан удаатай.
Тухайлбал есдүгээр сарын 15-нд тэр Казахстанд болсон уулзалтын үеэр орос хэлний боловсролыг дэмжиж, улс орондоо есөн орос сургууль шинээр нээж, Оросоос багш нарыг урьсан Киргизийн ерөнхийлөгч Садыр Жапаровт талархал илэрхийлж байсан юм.
Путин энэ үеэр хоёр орны харилцаа бүх салбарт хөгжихөд орос хэл чухал үүрэгтэйг онцлоод ОХУ нь Киргизстанд хөнгөлөлттэй үнэ тарифаар эрчим хүч нийлүүлдгийг сануулж байжээ.
Бишкек хот өмнө нь Зөвлөлтийн цэргийн жанжин Михайл Фрунзегийн нэрээр нэрлэгддэг байсан юм.
Зөвлөлт Холбоот Улс задрахтай зэрэгцэн 1991 онд энэ нэрийг халж байжээ.
Эх сурвалж: Radio Free Europe