Даваа гарагт ОХУ-ын ерөнхийлөгч Владимир Путин хоёр сар хүрэхгүй хугацааны өмнө халдлагад өртөж, сүйдсэн Крымийн гүүрний нөхцөл байдалтай танилцжээ.
Ингэхдээ тэр өөрөө Мерседес загварын автомашин жолоодож, гүүрээр гарсан байна.
19 км урт Крымийн гүүрийг 2018 онд Путин нээж байсан юм.
Путинийг өчигдөр ОХУ-ын засгийн газрын шадар сайд Марат Хуснуллин дагалдаж явжээ. Тэрбээр Путиний жолоодож явсан автомашины урд суудалд сууж, сэргээн засварлах ажлын явцыг танилцуулсан байна.
“Бид гүүрний баруун эгнээгээр явж байна. Миний ойлгосноор зүүн эгнээ нь засагдаж байгаа юм байна. Үүнийг дуусгах шаардлагатай. Бага хэмжээний эвдрэл гэмтэл харагдаж байгааг бүрэн засварлах хэрэгтэй байна” гэж Путин ярьж байгаа нь Оросын төв телевизийн видео дүрсэнд бичигдэж үлджээ.
Тэр бас гүүрэн дээр явган алхаж, нөхцөл байдалтай танилцсан байна.
Аравдугаар сарын 8-ны өдөр буюу Путиний 70 насны төрсөн өдрийн маргааш Крымийн гүүр дэлбэрч байв. Оросын тусгай албаныхан үүнийг Украины талын үйлдсэн террорист халдлага гэж дүгнэж байсан юм.
Дэлбэрэлтийн дараа Крымийн хойгийг Оросын эх газартай холбосон авто замын нэг хэсэг түр хаагдаж байжээ. Крымийн гүүртэй танилцсан нь Украины дайн эхэлснээс хойш ОХУ-ын ерөнхийлөгч фронтын шугамд хамгийн ойр ирсэн тохиолдол байлаа.
Эх сурвалж: Reuters