Нийслэлийн прокурорын газраас өнөөдөр нэр бүхий сэтгүүлчдийг тагнаж, чагнасан гэх асуудалд эрүүгийн хэрэг үүсгэн, шалгаж эхэлсэн тухайгаа мэдээлсэн.Харин тагнаж, чагнах үйл ажиллагааг Хууль зүйн сайд Ц.Нямдоржийн захиалгаар хийсэн гэх мэдээлэл зарим мэдээллийн хэрэгслээр цацагдаад байгаа юм. Энэ талаар Ц.Нямдорж сэтгүүлчдэд мэдээлэл өгч, байр сууриа илэрхийллээ. Тэрбээр, "Би сэтгүүлчийг тагнаж, чагна гэсэн үүрэг хэнд ч өгөөгүй. Эрдэнэтийн 49 хувь, С.Зоригийн хэрэгтэй холбогдуулж ийм зүйл хийж байгаа. Та нар намайг тагнаж байсан болохоос би та нарыг тагнаж, сэтгүүлчдэд гомдол гаргаж байсан удаагүй. Энэ бол зориудаар зохион байгуулж буй улс төрийн үйл ажиллагаа.
С.Зоригийг хөнөөсөн хэргийг шүүхээр шийдвэрлэсэнтэй холбоотойгоор ямар балиар үйл ажиллагаа явагдсаныг би баримтаар дэлгэн мэдээлэл хийсэн. Хүний цогцсыг айлын хашаанд аваачиж хаясан гэдгийг ярьж эхэлснээс хойш намайг ер амраахаа больсон. Үүнтэй холбоотойгоор айлган сүрдүүлэх үйл ажиллагааг эх захгүй хийж байна. Үүний цаана цөөн хэдэн хүн бий. Өөрсдийн муу муухайг далдлах гэсэн үндсэн санаа юм.
Машины дугуй руу буудсан гэдэг нь ямар учиртай юм, юу яригдаад байгаа юм энэ талаар судалж, хэвлэлийнхэн үнэн зөв мэдээлэл өгөөрэй гэж цагдаагийнханд хэлсэн.
Хамгийн харамсалтай нь манай цагдаагийн нэг албан хаагч бурхан болсон. Эрүүгийн цагдаагийн газрын дарга залуу Солонгост хүнд хагалгаанд ороод байхад тэр залууг хардаж, хэрэг үүсгэсэн. Тэр залуу Монголд ирээд хоёр хоноод тархиндаа цус харваж нас барсан. Ингэж л айлган сүрдүүлдэг. Тэр залуугийн нэрийг өнөөдөр тараасан гүтгэлэгтээ оруулсан байна лээ. Ер нь аймшигтай юм болж байна шүү. Уржигдар АТГ Л.Болдыг, өчигдөр Ж.Батзанданг дуудаж байцаалаа. Өнөөдөр ийм зүйл хийж байна. Үүний цаана Нямдорж байгаа л гэж харуулах гэсэн хэрэг.
Сая чуулган дээр би АН-ын бүлгийн дарга Д.Эрдэнэбаттай энэ тухай жаахан марзан байдлаар ярьж байгаад гарч ирлээ. “Чи Эрдэнэтийн 49 хувийг хувьчлах тогтоолд гарын үсэг зурсан байдаг. Тэрийг чинь би шалгасан байдаг. Одоо чи намайг огцруулах асуудлыг тавьдаг нь ёсзүйтэй юм уу?” гэх утгаар.
Эрдэнэтийн асуудал дээр 49 хувийнхны тэвчээр нь барагдаж байх шиг байна. Өдрөөс өдөрт ийм зүйлүүд гарч ирээд байна. Миний хүүхэд нэг жаахан бизнес хийдэг юм л даа. Тэр материалыг нь 2017 оны нэгдүгээр сард хууль бусаар татаж авсан байсан.
Надаар, миний танил хүмүүсээр оролдож байна. Сэтгэл зүйн асар их дарамтад байлгах гэж бодож байна. Зориг амьд сэрүүндээ иймэрхүү байдалд бүтэн жил амьдарсан юм. Дашбалбар, дараа нь талийгаач Зэнээ бурхан болохынхоо өмнөх жилүүдэд яг ийм байдалтайгаар хэдэн жил амьдарсан юм. Тэгэхээр тэр байдал над дээр ирж байга юм болов уу гэж бодогдож байна шүү" гэх мэдээллийг өгсөн юм.
