Лхагва гарагийн өглөө Украины Киев, Житомир, Винница гэсэн гурван бүс нутагт агаарын түгшүүр зарлажээ. Удалгүй Киевийн захад болон хотод дэлбэрэлт болсон гэх мэдээлэл олон нийтийн сүлжээгээр гарч эхэлсэн.
Киев хотын дарга Кличко Киев муж болон нийслэл хотын тэнгэрт агаарын довтолгооноос хамгаалах хүчнийхэн 10 камикадзе нисгэгчгүй онгоцыг устгасан тухай твитерээрээ мэдээлэв.
Мөн Киевийн бүс нутгийн цэргийн захиргааны дарга Олексий Кулеба дроны энэ халдлагыг "эрчим хүчний терроризм"-ийн үргэлжлэл гэж нэрлэжээ. Тэрээр мөн Украины нийслэл болон бүс нутагт өглөө "Шахид" нисгэгчгүй онгоцны дайралт эхэлсэн гэжээ. Түүний мэдээлснээр 11 камикадзе дроныг устгасан байна.
Киев хотод унасан камикадзе дроны хэсэг
ОХУ аравдугаар сарын 10-наас хойш Украины эрчим хүчний дэд бүтцэд цохилт өгч, ард иргэдийг гэрэл, дулаангүй болгож байна. Лхагва гарагт Москва Киев болон тус мужид халдсан талаараа тайлбар хийгээгүй байна.
Житомир мужийн цэргийн захиргааны дарга Виталий Бунечко дроны дайралтын хоёр дахь давалгаа гарч болзошгүйг анхаарууллаа.
Украин улс Ираныг Орост камикадзе дрон нийлүүлж байна гэж буруутгаж байгаа ч Москва, Тегеран хоёр үүнийг үгүйсгэж, Иран дайн эхлэхээс олон сарын өмнө цөөн тооны нисгэгчгүй онгоц илгээсэн гэж мэдэгджээ. Арванхоёрдугаар сард хэвлэл мэдээллээр Орос улс дроны нөөцөө нөхөж, намрын сүүлчээр тасалдаад буй довтолгоогоо үргэлжлүүлж магадгүй гэж мэдээлж байсан юм.
Дээрх мэдээллээс нэлээд сүүлд Ерөнхийлөгч Зеленский Киев болон Киев муж руу хийсэн дроныхалдлагын талаар тайлбар хийхдээ "Өнөөдөр өглөө Оросын арми 13 "Шахид"-аар довтолгоогоо эхэлсэн. Урьдчилсан байдлаар 13-ыг бүгдийг нь буудаж устгасан" гэж хэллээ.
Эх сурвалж: Toim.mn
