Ням гарагт болж өнгөрсөн хөл бөмбөгийн ДАШТ-ий шигшээ тоглолтын дараа Аргентины багийнхан аваргын алтан цомоо аваад баярлаж байх үеэр Туркийн алдартай тогооч Солт Бэ талбайд нэвтэрсэн байсныг сошиал сүлжээнд тарсан зураг, бичлэгүүдээс харж болохоор байв.
Жинхэнэ нэр нь Нусрет Гёкче болох Солт Бэ энэ үеэр дэлхийн аваргын алтан цомыг аваргуудтай зэрэгцэн гартаа барьж, үнсэж байсан юм.
FIFA-гийн дүрмээр бол алтан цомд зөвхөн түрүүлсэн багийнхан, албаныхан, төрийн тэргүүнүүд зэрэг цөөн хүмүүс хүрэх эрхтэй байдаг.
“Арван хоёрдугаар сарын 18-ны өдөр Лусайл стадионд болсон хаалтын арга хэмжээний дараа зарим шаардлагагүй хүмүүс хэрхэн талбайд нэвтэрснийг шалгаж байна. Холбогдох дотоод арга хэмжээг бид авах болно” гэж FIFA-гийн мэдэгдэлд өгүүлжээ.
Үнэтэй тансаг ангиллын стэкхаус сүлжээ рестораны эзэн Солт Бэ анх 2017 онд хоолны мах бэлтгэх, амтлах өвөрмөц арга техникээрээ дэлхий дахинд алдаршиж байсан юм.
Месси, Рональдо, Бекхэм зэрэг олон алдартай хөл бөмбөгчид түүний ресторанаар үйлчлүүлж байжээ.
Арваннэгдүгээр сард тэр ДАШТ-ий VIP суудалд Бразилын домогт тоглогчид болох Рональдо, Роберто Карлос, Кафу нартай зэрэгцэн сууж байгаа зураг болон FIFA-гийн ерөнхийлөгч Жанни Инфантинотой тэврэлдэж буйг харуулсан дүрс бичлэгээ сошиал сүлжээнд хуваалцаж байв.
Эх сурвалж: BBC