Даваа гарагийн шөнө ОХУ-ын Саратов хотын ойролцоох Энгельс агаарын баазад дроны халдлага гарсан тухай эх сурвалжууд өчигдөр орой мэдээлж байв.
Энгельс нь Украины хилээс 600 гаруй километр зайд оршдог, Оросын стратегийн цөмийн зэвсэгт хүчний бөмбөгдөгч онгоцнууд байрладаг бааз юм.
Тус бааз арванхоёрдугаар сарын 5-ны өдөр Украины талаас зохион байгуулсан дроны халдлагад өртөж байв.
Харин өчигдрийн халдлагын дараа ОХУ-ын батлан хамгаалах яам мэдээлэхдээ баазад довтолсон Украины дроныг буудаж унагасан ба энэ үеэр дроны хэлтэрхийнүүд газарт унахдаа гурван алба хаагчийн амийг хөнөөсөн гэжээ.
Саратов мужийн захирагч Роман Бусаргин халдлагын үеэр жирийн иргэдэд ямар нэг аюул учраагүйг мэдэгдээд амиа алдсан алба хаагчдын ар гэрт эмгэнэл илэрхийлсэн байна.
Украины агаарын зэвсэгт хүчний хэвлэлийн төлөөлөгч сансрын хиймэл дагуулаас авсан гэрэл зураг Энгельс баазад гарсан хохирлын бодит байдлыг удахгүй харуулах тухай мэдэгджээ.
Энэ халдлагаас хэдхэн цагийн дараа Оросын Холбооны Аюулаас Хамгаалах Алба тус улсын нутаг дэвсгэрт Брянск муж орчмоор нэвтэрсэн Украины хорлон сүйтгэгчдийн дөрвөн бүлгийг устгаснаа мэдээлсэн юм.
Тэдгээр бүлгүүд тэсрэх бодис, Германд үйлдвэрлэсэн автомат буугаар зэвсэглэсэн байсан гэжээ.
Энгельс бааз өмнө нь халдлагад өртөх үеэр Оросын агаарын хамгаалалт сул байгааг өөрийнх нь цэргийн мэргэжилтнүүд шүүмжилж байсан юм. Тэгвэл гурван долоо хоногийн дараа гарсан хоёр дахь халдлага нөхцөл байдал төдийлөн сайжраагүйг харуулж байна.
Өмнөх халдлагын үеэр мөн гурван алба хаагч амь үрэгдэж, хоёр нисэх онгоц хөнгөн гэмтсэн тухай ОХУ-ын батлан хамгаалах яам мэдээлж байжээ.
Эх сурвалж: BBC
