Хятад улс нэгдүгээр сарын 8-ны өдрөөс эхлэн Covid-19 өвчний зэрэглэлийг A-гаас B болгон бууруулахаар болсон билээ.
Ингэснээр гурван жил орчим хугацаанд хаалттай байсан хил нээгдэж, аялал жуулчлалын салбарт томоохон өсөлт гарах төлөвтэй болжээ.
Хилийн чанадад зорчих хүсэлтэй иргэдээс гадаад паспортын захиалга авах ажлыг нэгдүгээр сарын 8-ны өдрөөс сэргээхээ Хятадын эрх баригчид мэдээлсэн байна.
Үүнтэй холбоотойгоор Япон, Энэтхэг зэрэг хөрш орнууд нь Хятадын эх газраас ирэх зорчигчдоос коронавирусийн шинжилгээний хариу шаардахаар болжээ.
Даваа гарагт Хятадын хил нээгдэх болсон тухай шийдвэрийг зарласны дараа 30 минутын дотор trip.com аяллын сайтын хандалт жилийн өмнөхтэй харьцуулахад 10 дахин өссөн байна.
Хятадын иргэдийн хамгийн их хайсан аяллын чиглэл Макао, Хонконг, Япон, Тайланд, Өмнөд Солонгос байгааг тус сайт мэдээлжээ.
Хятадын аялал жуулчлалын Qunar агентлагийн вэб сайтын ачаалал шийдвэр зарласны дараах 15 минутын дотор долоо дахин өссөн байна.
Цар тахал эхлэхийн өмнөх жил буюу 2019 онд Хятадын эх газраас 155 сая хүн гадаадад аялж байжээ. 2020 онд энэ тоо 20 сая болж эрс буурсан юм.
Хил нээгдэх хугацаа Хятадын уламжлалт баяртай давхцаж байна. Нэгдүгээр сарын 22-нд тохиох сар шинийн баярын үеэр удаан хугацаанд уулзаагүй төрөл төрөгсөдтэйгөө уулзах гэсэн хүмүүсийн урсгал нэмэгдэх нь тодорхой байгаа.
2023 онд Хятадын агаарын тээврийн зорчигчдын тоо 2019 оны хэмжээний 70 хувьд хүрэх тооцоог Олон Улсын Агаарын Тээврийн Холбооны Умард Азийн зах зээл хариуцсан дэд ерөнхийлөгч Ше Шиньчуан танилцуулаад салбарынхандаа бэлтгэлтэй байхыг сануулжээ.
Эх сурвалж: BBC, South China Morning Post
