Өнгөрсөн оны сүүлчийн өдөр Донецкийн эзлэгдсэн нутаг дахь цэргийн хуаранд алсын цохилт өгөх үеэр Оросын хэдэн зуун алба хаагч алагдсан тухай Украины тал өчигдөр мэдээлжээ.
Харин Оросын тал хохирлын тоо хэмжээг нэлээд багаар мэдээлсэн байна.
Оросын хяналтад байгаа Донецк мужийн Макивка (оросоор Маковка) хотод байрладаг цэргийн хуаран Украины агаарын цохилтын бай болсон юм байна. Хуаранд бас сум, зэр зэвсгийн нөөцийг хадгалж байсан гэнэ.
Украины батлан хамгаалах яам Оросын 400 цэрэг алагдсан гэж мэдээлсэн бол ОХУ-ын батлан хамгаалах яам 63 гэж мэдээлжээ.
Хамгийн цөөнөөр тооцсон ч энэ бол Украины дайны үеэр Москвагийн эрх баригчдын хүлээн зөвшөөрсөн хамгийн том хохирлын хэмжээ болж байна.
Оросын талын Донецкийн засаг захиргааны албан хаагч Данил Безсоновын мэдээлснээр цэргийн хуаран болгож зориулалтыг нь өөрчилсөн мэргэжлийн сургуулийн байр шинэ он солигдох орой HIMARS-ийн пуужинд оногджээ.
“Мэргэжлийн сургуулийн байр Америкийн HIMARS пуужингийн томоохон халдлагад өртлөө. Олон хүн алагдаж, шархадсан бөгөөд нарийн тоог гаргаагүй байна. Барилга их хэмжээгээр сүйрсэн” гэж тэр Телеграм хуудсандаа бичсэн байна.
2014 онд Крымийг ОХУ-д нэгтгэхэд оролцож байсан Холбооны Аюулаас Хамгаалах Албаны офицер асан Игорь Гиркин “алагдаж, шархадсан хүний тоо хэдэн зуугаар тоологдохоор байна” гэж өчигдөр Телеграм хуудсандаа мэдээлжээ.
Тэрбээр сум, зэвсгийн нөөцийг цэргийн алба хаагчидтай нэг байранд хамт байрлуулсан нь ноцтой алдаа байсныг шүүмжилсэн байна.
“Энэ бол HIMARS пуужингийн цохилтын зайд боловсон хүчин, техник хэрэгслийг ийм нягт байрлуулсан цорын ганц тохиолдол биш” гэж Гиркин бичжээ.
Эх сурвалж: Reuters
