Хүн амины хэрэг үйлдсэн трансжендэр эмэгтэйг цаазлах ажиллагаа өчигдөр АНУ-ын Миссури мужийн шоронд болжээ.
49 настай Амбер Маклафлин судсандаа үхлийн тариа шахуулсны дараа орон нутгийн цагаар 19:00 цагийн орчимд амьсгал хураасныг шоронгийн захиргаа мэдээлсэн байна.
“Би хийсэн зүйлдээ гэмшиж байна. Би хайр, халамжтай хүн байсан юм шүү” гэж тэр сүүлчийн үгээ бичиж үлдээжээ.
Маклафлин нь АНУ-ын цаазын түүхэнд анхны хүйсээ солиулсан хүн, бас 2023 оны анхны цаазлуулагч байсныг албаныхан мэдээлсэн байна.
Тэрбээр 2003 онд Сэнт Луйз хотын захын дүүрэгт өмнө нь найзалж байсан эмэгтэйн амийг хөнөөж байжээ. Энэ хэрэг түүнийг хүйсээ солиулахаас өмнө болсон юм байна.
Тухайн үед Маклафлин ажлаасаа тараад явж байсан Бэвэрли Гюнтер гэгч эмэгтэйг хүчиндэж, гал тогооны хутгаар амийг нь бүрэлгээд цогцсыг Миссиссипи голд хаяж байжээ.
Шүүх 2006 онд түүнийг хүн амины хэргээр ялласан ч ямар шийтгэл оноох тал дээр маргаан үүсч байв. Маргаан нэлээд өргөн хүрээг хамарч, Миссури мужаас Конгресст сонгогдсон Кори Буш, Эмануэл Кливер зэрэг улс төрчид хүртэл оролцож байжээ. Ингээд Миссури мужийн хуулийн дагуу шүүгч давуу эрхээ эдлэн цаазын ял оноосон байна.
Өмгөөлөгч нь Маклафлинийг хүүхэд насандаа олсон сэтгэцийн эмгэгээсээ болж хэрэг үйлдсэн үндэслэлээр бүх насаар нь хорих ял оноохыг хүсэж байсан юм.
Сүүлд хүйсээ солиулсан ч түүнийг Миссуригийн шоронгийн эрэгтэй хоригдлуудын хэсэгт хорьж байжээ.
АНУ-д цаазын ялыг цуцлахын төлөө тэмцдэг “The Death Penalty Information Centre” байгууллага Маклафлинаас өмнө хүйсээ солиулснаа нийтэд ил тод зарласан хүн цаазлуулсан тохиолдол бүртгэгдээгүйг баталсан байна.
Эх сурвалж: AFP