Дани улсын банкнууд түүхэндээ анх удаа ганц ч дээрэмгүй бүтэн жилийг үдсэнээ өчигдөр мэдээлжээ.
Бэлэн мөнгөний хэрэгцээ улам бүр багассан нь үүний гол шалтгаан болсныг тус улсын санхүүгийн ажилтнуудын үйлдвэрчний эвлэл дүгнэсэн байна.
“Энэ бол ач холбогдол өгөхгүй байх аргагүй үйл явдал. Учир нь дээрэм гарах бүрд манай салбарын холбогдсон ажилтнууд сэтгэл санааны гүн хямралд ордог. Үүнийг биеэр үзээгүй хүн сэтгэл зүйд үзүүлэх нөлөөг нь ойлгохгүй” гэж тус үйлдвэрчний эвлэлийн дэд ерөнхийлөгч Стэн Лунд Олсен ярьжээ.
2000 онд Дани улсын банкнуудад 221 дээрмийн хэрэг гарч байсан бол жил бүр тасралтгүй буурсаар 2017 оноос хойш 10 хүрэхгүй хэрэг гардаг болсон гэнэ.
Дани улсын төв банк 2017-2021 оны хооронд бэлэн мөнгөний хэрэглээ 23 хувиар буурсныг өнгөрсөн гуравдугаар сард мэдээлж байжээ.
Цар тахал энэ үйл явцыг улам түргэсгэсэн байна.
Эх сурвалж: AFP
