1968 онд дэлгэцэнд гарч, Оскарын шагнал хүртэж байсан “Romeo and Juliet” киноны жүжигчид Парамаунт Пикчерс кино компанийг бэлгийн хүчирхийллийн хэргээр шүүхэд өгчээ.
Одоо 70 гарсан настай Английн жүжигчид болох Леонард Уайтинг, Оливиа Хасси нар тухайн үед өсвөр насны хүүхдүүд байсан юм.
Зураг авалтын үеэр найруулагч Франко Зеффирелли тэднийг хуурч, урьдчилан тохирсноосоо буцаж, камерын өмнө нүцгэлсэн тул учруулсан хохирлыг $500 саяар барагдуулахаар шүүхэд ханджээ.
Найруулагч Зеффирелли 2019 онд нас барсан тул шүүхэд Парамаунт Пикчерс компани дуудагдаж байгаа юм байна.
Жүжигчдийн гаргасан гомдолд өгүүлснээр найруулагч эхлээд унтлагын өрөөний үзэгдлийн зургийг авахдаа тэдэнд арьсны өнгөтэй хувцас өмсгөхөө амлаж байжээ.
Дараа нь яг эхлэхийн өмнө нүцгэнээр зураг авах санал тавьж, нүцгэн биеийг нь тод гаргахгүйгээ амласан байна.
Харин киноны эцсийн хувилбар дүрс дээр Уайтингийн өгзөг, Хассигийн хөх хэсэгхэн хугацаанд ил гардаг юм.
Зеффирелли нүцгэнээр зураг авхуулахгүй бол кино төсөл дампуурах, жүжигчдийн цаашдын амжилтад саад учрах зэрэг эрсдэлтэйг ухуулан ятгаж байжээ.
Киноны зургийг авах үед Уайтинг 16, Хасси 15 настай байсан юм.
Одоо тэд 72, 71 настай.
Ахмад жүжигчид Парамаунт Пикчерс компанийг бэлгийн хүчирхийлэл, бэлгийн дарамт, луйврын хэрэгт буруутгасан байна.
Холливүүдийн студи тэдний нүцгэн зургийг ашиглан мөнгө олж, бэлгийн мөлжлөгийн хохирогч болгосон гэж тэд гомдол гаргажээ.
Жүжигчид зураг авалтын үеэр үзсэн сэтгэл зүйн дарамтынхаа улмаас олон арван жил зовж шаналсан тул киноны орлогоос хохирлоо барагдуулах үндэслэлтэй гэж үзсэн байна.
Шекспирийн сонгодог зохиолоос сэдэвлэсэн “Romeo and Juliet” кино тухайн үедээ өндөр амжилт гаргаж, Оскарын дөрвөн шагналд нэр дэвшээд шилдэг зураглал, шилдэг хувцас дизайны хоёр шагналыг хүртэж байжээ.
Эх сурвалж: BBC
