Улсын Их Хурал(УИХ) дахь Монгол Ардын Нам(МАН)-ын бүлгээс өнөөдөр Төрийн ордонд хэвлэлийн хурал зохион байгуулж, гаргасан шийдвэрээ танилцуулсан.

Энэ үеэр сэтгүүлч "Нүүрсний хулгай, Хөгжлийн Банк зэрэг хэрэгт нэр холбогдоод буй гишүүдийн эрхийг түдгэлзүүлэх асуудлыг хурлаараа ярьсан уу. Мөн УИХ-ын гишүүн Ч.Ундрамын талаар Ёс зүйн байнгын хороогоор хэлэлцэнэ гэсэн мэдээлэл бий. Бүлэг дээр энэ асуудлууд яригдсан уу" хэмээн асуув.

УИХ дахь МАН-ын Бүлгийн дарга Д.Тогтохсүрэн "Бүлэг дээр энэ асуудал яригдаагүй.

УИХ-ын гишүүн Ч.Ундрамтай холбоотой асуудлаар Сахилга хариуцлагын байнгын хороонд нэлээд иргэнээс өргөдөл хүсэлт ирсэн юм байна лээ. Хуулийн дагуу Сахилга хариуцлагын байнгын хороо үүнийг ярих болов уу гэж бодож байна.

Бусад гишүүний тухайд нүүрсний, Хөгжлийн Банкны гээд эрүүгийн хэрэг үүссэн байгаа. Хууль хяналтын байгууллагаас ирүүлэх саналаар яригдаж, цааш явна. Одоогоор хууль, хяналтын байгууллагад шалгагдаж байгаа асуудлаар буруутай, буруугүй гэж авч үзэх ямар ч боломжгүй" гэв.

Эргэн сануулбал, УИХ-ын гишүүн Ч.Ундрамын нөхөр нь түүнийг "Гэр бүлийн хүчирхийлэгч" хэмээн олон нийтийн сүлжээнд бичиж, хэд хэдэн бичлэг нийтэлсэн юм.

УИХ-ын гишүүн ёс зүйн зөрчил гаргавал:

• Сануулга өгөх,
• Уучлал гуйхыг үүрэг болгох,
• Албан тушаалын цалингийн хэмжээг 6 сар хүртэл хугацаагаар 20 хүртэл хувиар бууруулахаар ёс зүйн дүрэмд тусгасан байдаг.