1961 онд байгуулагдаж байсан АНУ-ын Atlantic Council стратегийн судалгааны хүрээлэн олон улсын шилдэг 167 экспертийн дунд ирэх 10 жилийн хугацаанд дэлхий яаж өөрчлөгдөх талаар санал асуулга зохион байгуулж, үр дүнг нь өчигдөр танилцуулжээ.
Ингэхэд тэдний 46 хувь нь Орос улсыг 2033 он гэхэд задрах, 21 хувь нь сүйрэх таамаг дэвшүүлсэн байна.
“Хамгийн гайхмаар үр дүн бол ойрын 10 жилийн хугацаанд Орос улсыг сүйрэх тухай зөгнөсөн судлаачдын хариулт байлаа. Украины эсрэг өдөөсөн Кремлийн дайн нь манай гарагийн хамгийн том цөмийн зэвсэгтэй гүрнийг ямар ноцтой том үр дагаварт хүргэж болзошгүйг энэ үр дүн харуулж байна” гэж тус тайланд өгүүлсэн байна.
Prepare for Russia’s coming crack-up?
— Atlantic Council (@AtlanticCouncil) January 9, 2023
Plan for a Chinese military assault on Taiwan?
Brace for the spread of nuclear weapons?@ACScowcroft asked 167 global strategists and foresight practitioners what the world might look like in a decade.
Start here: ➡️ https://t.co/5TXhXuCLlv pic.twitter.com/HNZxaECyMv
Ойрын 10 жилийн дотор хувьсгал, иргэний дайн, улс төрийн хуваагдлын улмаас задарч болзошгүй улсыг нэрлэхийг хүсэхэд судлаачдын хамгийн олон нь буюу 46 хувь нь Орос улсыг нэрлэжээ.
Дараа нь 8 хувьтай АНУ, 6 хувьтай Хятад улс, 1 хувьтай Энэтхэг улс жагссан байна.
Харин ирэх 10 жилийн дотор сүйрэх улсыг нэрлэхийг хүсэхэд мөн хамгийн олон нь буюу 21 хувь нь Орос улсыг нэрлэжээ.
Дараа нь 10 хувьтай Афганистан, тус бүр 8 хувьтай Пакистан, Венесуэл, 7 хувьтай АНУ жагссан байна.
Украины дайнтай холбоотойгоор Өрнөдийн орнуудын тавьсан хориг арга хэмжээний улмаас Оросын эдийн засаг өнгөрсөн оны арваннэгдүгээр сард албан ёсоор уналтын төлөвт шилжсэн юм.
Өнгөрсөн сарын эхээр Европын Холбооны санаачилсан газрын тосны үнийн дээд хязгаар ойрын саруудад Оросын эдийн засгийг шинэ цочролд оруулахаар байгааг тус улсын төв банк анхааруулж байв.
Atlantic Council байгууллагын санал асуулгын бусад сонирхолтой үр дүнгүүдээс танилцуулбал ирэх 10 жилийн хугацаанд:
- Судлаачдын 68 хувь нь Иран, 32 хувь нь Саудын Араб, 19 хувь нь Өмнөд Солонгос, 14 хувь нь Япон улсыг цөмийн зэвсэгтэй болно гэж үзжээ.
- Аль ч улс цөмийн зэвсэг хэрэглэхгүй (58 хувь), Орос (14), Умард Солонгос (10) хэрэглэнэ гэж хариулсан байна.
- Судлаачдын 70 хувь нь Хятад улс Тайванийг эзлэн түрэмгийлэх оролдлого хийнэ гэж үзжээ.
- 61 хувь нь Орос-НАТО-гийн хооронд шууд мөргөлдөөн гарахгүй
- 71 хувь нь АНУ зэвсэгт хүчний тэргүүлэх гүрэн хэвээр байна
- 13 хувь нь Ардчилсан засаглалд шилжих хамгийн өндөр магадлалтай улс Иран гэсэн бол тус бүр 7 хувь нь Орос, Турк улсыг нэрлэсэн байна
- Авторитар дэглэмд шилжих хамгийн өндөр магадлалтай улсаар тус бүр 9 хувь нь АНУ, Унгар, Энэтхэг улсуудыг, 8 хувь нь Туркийг нэрлэсэн байна.
Эх сурвалж: Business Insider
