Өнгөрсөн оны есдүгээр сард ОХУ даяар эхэлсэн цэргийн хэсэгчилсэн дайчилгаанаас зугтсан таван залуу Инчоны олон улсын нисэх буудалд олон сар амьдарч буй тухай Өмнөд Солонгосын хэвлэлүүд мэдээлжээ.

Тэд “бусдын газар нутгийг эзлэн түрэмгийлэх дайнд оролцож, хүн алахыг хүсээгүй” гэсэн шалтгаанаар Өмнөд Солонгосын засгийн газраас улс төрийн орогнол хүссэн ч зөвшөөрөөгүй юм байна.

Улмаар тэд уг шийдвэрийг давж заалдахаар шүүхэд ханджээ. Хууль зүйн яам цэрэг татлагаас оргон зайлах нь улс төрийн орогнол олгох шалтгаан биш гэсэн үндэслэлээр татгалзсан юм байна.

Шүүхийн шийдвэр энэ сарын сүүлээр гарах гэнэ.

Тэд одоо Инчоны олон улсын нисэх буудлын завсрын бүсэд Өмнөд Солонгосын хууль зүйн яамнаас өгдөг багахан хүнсээр гол зогоон амьдардаг ажээ.

Таван дүрвэгчийн нэг Владимир Марахтаев буриад үндэстэн бөгөөд Буриадын Улсын Их сургуулийн хэл шинжлэлийн ангийн хоёрдугаар курсийн оюутан юм байна.

Цэргийн зарлан дуудах бичиг хүлээж авсан Марахтаев автомашинаар Монгол улсын хил нэвтэрч, цаашаа Улаанбаатараас Филиппиний Манила хот руу нисэж байжээ.

Тэнд хэдэн долоо хоног саатсаны дараа арван нэгдүгээр сарын 12-ны өдөр Инчонд газардсан байна.

“Өмнөд Солонгост ямар ч хэлхээ холбоо байхгүй боловч би ардчилал, хүний эрх өндөр хөгжсөн улс гэдэг утгаар нь найдаж энд ирсэн. Энэ улсын өмнөх ерөнхийлөгч нар авлигын хэргээр шийтгүүлсэн тухай мэдээ намайг үнэхээр гайхшируулдаг. Оросын удирдагчийг ингэж шүүж байна гэж бид төсөөлж ч чадахгүй” гэж тэр хэвлэлд ярьжээ.

Одоо тэдний хувь заяа Өмнөд Солонгосын шүүхийн шийдвэрээс хамаарах болоод байна.

Өмнөд Солонгос нь гадаадын дүрвэгчдийг хүлээж авах тал дээр нэлээд хатуу байдаг. 2021 онд тус улс хүсэлт гаргасан дүрвэгчдийн ердөө 1.3 хувьд зөвшөөрөл олгосон нь Их 20-ын бүлгийн орнуудын дотор хоёрт орох доогуур үзүүлэлт юм.

Эх сурвалж: Korea Times