Оросын эрх баригчид Украинд явуулж буй байлдааны ажиллагааныхаа ерөнхий командлагчийг өчигдөр сольжээ.
ОХУ-ын батлан хамгаалахын сайд Сергей Шойгу “цэргийн тусгай ажиллагаа”-ны ерөнхий командлагчаар тус улсын зэвсэгт хүчний жанжин штабын дарга, генерал Валерий Герасимовыг томилсон байна.
Одоогийн командлагч, харгис хэрцгий тактикаараа “генерал Армагеддон” хочтой болсон Сергей Суровикинийг огцруулжээ.
Тэрбээр гурван сар орчим хугацааны өмнө Украины дайны ерөнхий командлагчаар томилогдож байв.
Суровикиний үед Оросын арми Украины хотуудын дэд бүтцийг агаараас довтолж сүйтгэснээс өөр тодорхой ахиц дэвшил гаргаагүй юм.
Мөн дайн эхэлсэн цагаас хойш эзлээд байсан ганц бүс нутгийн төв болох Херсон хотоос ухрах шийдвэрийг гаргаж байв.
ОХУ-ын батлан хамгаалах яамны мэдэгдэлд энэхүү халаа сэлгээ нь “ажиллагааг илүү үр дүнтэй болгоход чиглэсэн” гэж тайлбарлажээ.
Генерал Суровикинийг шинэ командлагч Герасимовын орлогчоор томилсон байна.
Өнөөдөр Орос, Украины талууд Донецк мужийн Бахмут хотын ойролцоох 10,000 орчим оршин суугчтай Соледар нэртэй жижиг хотын төлөө ширүүн тулалдаж байгаа.
Мягмар гарагт Вагнер Групп тус хотыг эзэлж авснаа мэдээлсэн ч Украины тал үүнийг нь няцаасан юм. Өчигдөр ОХУ-ын батлан хамгаалах яам десантын зэвсэгт хүчний анги нь Соледарыг хойд болон өмнөд талаас нь таслан хаасан тухай мэдээлж байв.
“Соледарт ширүүн тулаан үргэлжилж байна. Дайсны тал хохирол амссаныхаа дараа хүчээ сэлбээд манай байрлалуудыг эзэлж, хотод бүрэн хяналтаа тогтоохыг оролдсон ч одоогоор амжилт олоогүй байна” гэж Украины батлан хамгаалахын дэд сайд Ханна Малиар сошиал хуудсандаа бичжээ.
Кремлийн хэвлэлийн төлөөлөгч Дмитрий Песков “Албан мэдээ гарах хүртэл яаралгүй хүлээх хэрэгтэй. Ямартай ч нааштай үйл явц өрнөж байгаа тухай мэдээлэл ирж байна. Тактикийн амжилт маш чухал ч манай дайчдын баатарлаг үйлсийн үнэ цэнээр олдож байгааг санах хэрэгтэй” гэж өчигдөр ярьсан байна.
Эх сурвалж: Reuters
