УИХ-ын чуулганы нэгдсэн хуралдаанаар Нүүрсний асуудлаарх Ерөнхий хяналтын сонсголын тайлантай холбогдуулан авах арга хэмжээний тухай тогтоолын төслийг хэлэлцэж байна.
Тогтоолын төсөлтэй холбогдуулан УИХ-ын гишүүн Ж.Батжаргал ажлын хэсгээс асуулт асуулаа.
Тэрбээр “Нөхцөл байдал хүнд байгаа энэ үед 1,072 хувьцааны ногдол ашгийг Сар шинийн баяраас өмнө иргэдэд олгох хэрэгтэй. Төрийн зүгээс ард түмэнд 2021, 2022 оны ногдол ашгийнхаа хувийг тэгш хүртэх боломжийг нэгдүгээр сард багтаан бүрдүүлэх ёстой” гэлээ.
Түүний асуултад УИХ-ын гишүүн, ЭМ-ийн сайд С.Чинзориг “Эрдэнэс Тавантолгой" ХК-ийн хувьцааг иргэдэд эзэмшүүлэх, үр өгөөжийг нэмэгдүүлэх нь чухал асуудал болоод байна. Тус компанийн хөрөнгөд дахин үнэлгээ хийж, 1,072 хувьцааны нэгж хувьцааны үнийг шинээр тогтоох шаардлагатай байна. Энэ хүрээнд тогтоолын төсөлд хоёр заалт тусгасан.
- 2012 оны дөрөвдүгээр сарын 1-ний өдрөөс хойш төрсөн хүүхдүүдэд хувьцааг шинээр эзэмшүүлэх
- Сүүлийн жилүүдэд 1,072 хувьцааны ногдол ашгийг иргэдэд өгөөгүй бөгөөд үүнийг нөхөн олгох заалтыг энэ төсөлд оруулсан.
Ингэснээр иргэд баялгаасаа тэгш хүртэх боломж илүү бодитой болно" гэж хариуллаа.
